काठमाडौं- दशैं तिहार तथा छठको अवसरमा राष्ट्र बैंकले डिजिटल वालेटको कारोबार संख्याको सीमा सहज बनाइदिएको छ। 

चाडपर्वको अवसरमा कारोबार संख्यामा अस्थायी वृद्धि गरिएको राष्ट्र बैंकले जानकारी दिएको छ। पर्वको अवसरमा दान दक्षिणा तथा अन्य आदानप्रदान हुने भएकाले कारोबार संख्या बढाइएको हो। 

हाल प्राकृतिक व्यक्तिले डिजिटल वालेटमा एक दिनमा १० पटक मात्रै रकम जम्मा गर्न सक्ने व्यवस्था छ । तर, दशैं–तिहार लगायत चाडपर्वमा भने वालेटमा एक दिनमा ३० पटकसम्म रकम जम्मा गर्न सक्ने व्यवस्था गरेको छ ।

‘बडा दशैंको शुभ अवसरमा २१ असोजदेखि १ कात्तिक कोजाग्रत पूर्णिमासम्म र दिपावली तथा छठ पर्वको अवसरमा १५ कात्तिक देखि २२ कात्तिकसम्म प्राकृतिक व्यक्तिले डिजिटल वालेटमा एक दिनमा ३० पटकसम्म रकम जम्मा गर्न सक्नेछन्,’ राष्ट्र बैंकले भुक्तानी सेवा प्रदायकलाई जारी गरेको निर्देशनमा छ ।