काठमाडौं- पृथ्वी राजमार्गअन्तर्गत धादिङको झ्याप्लेमा अवरुद्ध सडक खुलेपछि राजमार्गमा अलपत्र परेका १ हजार ७ सय ७ सवारीसाधन काठमाडौं उपत्यका भित्रिएका छन्।
गृह मन्त्रालयका प्रवक्ता ऋषिराम तिवारीले आइतबार साझँदेखि झ्याप्लेमा अवरुद्ध सडक खुलेयता अलपत्र यात्रुहरुसहित लिएर सयौँ सवारीसाधन काठमाडौं भित्रिएको जानकारी दिए।
त्यसैगरी सोमबार दिउँसोपछि काठमाडौंबाट पनि सो राजमार्ग भएर सवारीसाधन पठाउने तयारीमा प्रहरी खटिएको प्रवक्ता तिवारीले जानकारी दिए।
'आजबाट उपत्कायबाट पनि पृथ्वी राजमार्ग हुँदै सवारी साधन बाहिरने छन्' उनले भने 'मुख्य राजमार्गका साथै अन्य अवरुद्ध सडक सञ्चालनका लागि गृह मन्त्रालयले अन्य निकायसित समन्वय गरेर अघि बढेको छ।'
त्यसैगरी सोमबार दिउँसो गृहमन्त्रालयमा केन्द्रीय सुरक्षा समितिको बैठक समेत गृहमन्त्री रमेश लेखकले बोलाएका थिए। बैठकमा सुरक्षा निकायका प्रमुखहरुले बाढी, पहिरो, डुबान तथा विपद्मा भइरहेको उद्दार, राहत, घाइतेको उपचार र अवरुद्ध सडक खुलाउने विषयमा भइरहेको जानकारी गराएका छन्।
'आज साझँसम्म काभ्रेपलान्चोकको बीपी राजमार्ग अन्तर्गत रोशी खोलामा अलपत्र परेका सबै यात्रुहरुको उद्दार भइसक्छ' प्रवक्ता तिवारीले भने 'अहिले त्यहाँ नेपाली सेनासहित सुरक्षाकर्मीको टोली हवाइ उद्दारदेखि डोरीको सहायताबाट समेत अलपत्र यात्रुहरुको उद्दार निरन्तर गरिरहेको छ।'
प्रवक्ता तिवारीले मौसम पूर्णरुपमा सामान्य बनिनसकेको अवस्था रहेकाले यात्रा गर्दा सावधानी अपनाउनुपर्नेमा जोड दिए। 'विस्तारै सडक खुल्ने र खुलाउनेक्रममा छ' उनले भने 'अझै पहिरोलगायत जोखिम टरिसकेको छैन।'
अवरुद्ध सडक खुलाउन सरोकारवाला निकायका साथै मुलुकका विभिन्न स्थानमा सुरक्षाकर्मीको टोलीसमेत परिचालन भएको छ।
'रोशीलगायत प्रभावित क्षेत्रमा स्वास्थ्य शिविर सञ्चालन गर्नुका साथै राहत वितरण पनि हुँदैछ' प्रवक्ता तिवारीले भने 'घाइतेहरुको उद्दार गरी विभिन्न अस्पतालमा निःशुल्क उपचार भइरहेको छ।'
