काठमाडौं- चालु आर्थिक वर्षको पाँच महिनामा मूल्य वृद्धिदर ७.११ प्रतिशत पुगेको छ। विश्वव्यापी रुपमा मूल्यवृद्धि बढ्दै गएको छ।यसको प्रभाव नेपालमा पनि देखिँदै आएको छ।

नेपाल राष्ट्र बैंकले सार्वजनिक गरेको तथ्यांकअनुसार सबैभन्दा बढी मूल्य वृद्धि घ्यु/तेलमा देखिएको छ।

२०७७ मंसिरको तुलनामा घ्यु/तेलको मूल्य २८.५२ प्रतिशतले बढेको हो। यसैगरी यातायात क्षेत्रको मूल्य वृृद्धिपनि १६.२५ प्रतिशतले बढेको छ।

यसैगरी दात तथा गेडागुडीमा ११.७९, शिक्षामा ११.७८ र सुर्तीजन्य पदार्थको मूल्य भने ११.७४ प्रतिशतले बढेको छ।

यसैगरी समीक्षा महिनामा काठमाडौं उपत्यकामा ५.९१ प्रतिशत, तराईमा ७.५२ प्रतिशत, पहाडमा ६.९५ प्रतिशत र हिमालमा४.९१ प्रतिशत मुद्रास्फीति रहेको छ।

२०७७ मंसिरमा यीक्षेत्रहरुमा क्रमशः ३.७१ प्रतिशत, २.३५ प्रतिशत, ३.९५ प्रतिशत र ४.२२ प्रतिशत मुद्रास्फीति रहेको थियो। यसैगरी २०७८ मंसिरमा वार्षिक बिन्दुगत थोक मुद्रास्फीति ७.२२ प्रतिशत रहेको छ। अघिल्लो वर्षको सोही महिनामा यस्तो मुद्रास्फीति ७.४६ प्रतिशत रहेको थियो।

साथै समीक्षा महिनामा उपभोग्य वस्तु, मध्यवर्ती वस्तु र पुँजीगत वस्तुको थोक मूल्यवृद्धि क्रमशः ९.२२ प्रतिशत, ६.११ प्रतिशत र ७.२४ प्रतिशत रहेको छ। समीक्षा महिनामा निर्माण सामग्रीको थोक मूल्यवृद्धि १९.३४ प्रतिशत रहेको छ।