इटहरी- सप्तकोसी नदीको बिचमा २५ जना अलपत्र परेका छन्। अलपत्र परेकालाई उद्धार गर्न मोटरबोट प्रयोग गर्ने तयारी भइरहेको छ।
सुनसरीको बराहक्षेत्र नगरपालिका ६ र ९ नम्बर वडा क्षेत्रमा फसेका स्थानीयलाई उद्धार गर्न नेपाली सेनाको टोली परिचालन भएको छ।
नेपाली सेना र सशस्त्र प्रहरीसहितको टोलीले उद्धारको प्रयास जारी राखेको तर तत्काल सम्भव नदेखिएको प्रमुख जिल्ला अधिकारी रामचन्द्र तिवारीले जानकारी दिए।
मोटरबोटबाट उद्धार गर्ने प्रयास गरे पनि पानीको अत्याधिक बहाव र काठको मुढाका कारण समस्या भएको उनको भनाइ छ।
ताप्लेजुङ र पाँचथर जोड्ने मेची राजमार्गको हेवा खोला पुल भत्किएको छ।
सप्तकोसीको बाढीले उदयपुरको बेलका नगरपालिकाको वडा नं. १, २, ३, ८ र ९ उच्च जोखिममा परेका छन्।
कोसी ब्यारेजमा ५ लाख २१ हजार क्युसेक बहाव पुगेको छ।
