काठमाडौं- अविरल वर्षाका कारण ३१ वर्षपछि कुलेखानी ड्यामकाे ढाेका खाेलिएकाे छ। अविरल वर्षाका कारण कुलेखानी जलाशय भरिएपछि शनिबार बिहान ५:४० बजे ड्यामको ढोका खोलिएको हाे।

यसअघि २०५० सालमा कुलेखानी ड्यामको ढोका खोलिएको थियाे। 

नेपाल विद्युत् प्राधिकरणको व्याकअपको रुपमा रहेको जलाशय शनिबार बिहान भरिएको थियो। जलाशयको भन्डारण गर्ने क्षमता एक हजार ५ सय ३० मिटर रहेको छ। अझ जलाशयमा क्षमता भन्दा बढी ३५ सेन्टिमिटर पानी संकलन गरिएको थियो। 

अहिले प्रतिसेकेन्ड ३ सय क्युसेक पानी फालिएको प्राधिकरणले जनाएकाे छ।

गत वर्ष कुलेखानी जलाशय भरिएको थिएन अहिलेको असाेजमा आएर भरिएको छ। गत वर्ष कुलेखानी जलाशयमा एक हजार ५ सय २६ मिटरमात्र पानी संकलन भएको थियो।

कुलेखानी जलाशय भरिएको अवस्थामा पानी खपत गर्न कुलेखानीका तीन वटै विद्युत् गृह सञ्चालन गरिएको छ। कुलेखानी जलविद्युत् आयोजनाबाट १०६ मेगावाट विद्युत् उत्पादन हुन्छ।