काठमाडौं- व्यवसायी सौरभ ज्योतिले आफ्नै काका रुप ज्योतिविरुद्ध दायर गरेको मुद्दामा उच्च अदालत पाटनले कारण देखाउ आदेश जारी गर्दै छलफलका लागि विपक्षीलाई बोलाउने अन्तरकालीन आदेश जारी गरेको छ।
न्यायाधीश किरण पौडेल र मिना गौतम सेडाईको इजलासले सौरभले अन्तरकालीन आदेश माग गर्दै दायर गरेको मुद्दामा सुनुवाइ गर्दै कारण देखाउ आदेश जारी गरेको हो।
व्यावसायिक घराना ज्योति समूहमा सम्पत्ति माथिको स्वामित्वको विषयलाई लिएर विवाद उत्पन्न भएको थियो। केही समयअघि समूहका रुप ज्योति र पद्म ज्योतिबीच विवाद उत्पन्न भएको थियो। विवाद उत्कर्षमा पुग्दा गत वर्ष सार्वजनिक रूपमै एक अर्काबीच आरोप प्रत्यारोप भएको थियो।
अन्तत: यो विवाद अदालतसम्म पुगेको छ।
ज्योति समूहको स्वामित्वमा रहेका विभिन्न कम्पनी, त्यस्ता कम्पनीले चर्चेको जग्गा जमिनमाथिको स्वामित्वको विषयलाई लिएर विवाद उत्पन्न भएको थियो।
