काठमाडौं- सरकारले प्रतिस्थापन विधेयकमार्फत मोटरसाइकलमा लाग्दै आएको कर वृद्धि गरेको छ। योसँगै मोटरसाइकलको सडक निर्माण कर बढेको छ। संसदमा प्रस्तुत भएको प्रतिस्थापन विधेयक शुक्रबार राति १२ बजेदेखि कार्यान्वयनमा आउने छ।
सरकारले यसअघि १५५ सीसीको मोटरसाइकलमा ४० प्रतिशत अन्तशुल्क लगाएको थियो भने १५५ सीसीदेखि २५० सीसीसम्मका मोटरसाइलमा ४० प्रतिशत नै अन्तशुल्क थियो।
तर प्रतिस्थापन विधेयमा मोटरसाइकलको वर्गीकरण नै परिवर्तन गरिएको छ। १२५ सीसीसम्मका मोटरसाइलमा ४० प्रतिशत, १२५ देखि २ सय सीसीसम्म ५० प्रतिशत र २ सयदेखि २५० सीसीका मोटरसाइकलमा ६० प्रतिशत अन्तशुल्क लाग्ने व्यवस्था गरेको छ।
यसैगरि ५ सयदेखि ८ सय सीसीसम्मका मोटरसाइकलमा ८० प्रतिशत अन्तशुल्क थियो। अहिले यो वर्गका मोटरसाइकलमा १०० प्रतिशत अन्तशुल्क लाग्ने व्यवस्था गरिएको छ।
निर्माण दस्तुरसमेत वृद्धि
प्रतिस्थापन विधेयकबाट सडक निर्माण दस्तुर समेत बढाएको छ। सरकारले कर उठाउनकै लागि मोटरसाइकलको वर्गीकरण थप गरेको छ।
यसअघि १ सय ५५ सीसीसम्मका मोटरसाइकमा १५ हजार रुपैयाँ, १५५–२५० सीसीसम्मका मोटरसाइकलमा १८ हजार रुपैयाँ, २५०–४०० सीसीससम्मका मोटरसाइकलमा ५० हजार रुपैयाँ र ४ सय सीसीभन्दा माथिका मोटरसाइकलमा १ लाख रुपैयाँ सडक निर्माण दस्तुर लाग्थ्यो।
तर प्रतिस्थापन विधेयकमा वर्गीकरण थप गरि सडक निर्माण दस्तुर बढाइएको छ। नयाँ व्यवस्थाअनुसार १२५ सीसीसम्मका मोटरसाइकल तथा स्कुटरमा १५ हजार रुपैयाँ, १२५–२५० सीसीसम्मका मोटरसाइकलमा १८ हजार रुपैयाँ, २५०–४०० सीसीसम्मका मोटरसाइकलमा ५० हजार रुपैयाँ र ४०० सीसीमाथिका मोटरसाइकलमा १ लाख रुपैयाँ सडक निर्माण दस्तुर लाग्ने व्यवस्था गरिएको छ।
यो परिवर्तनबाट १२५ सीसीदेखि १५५ सीसी क्षमताका मोटरसाइकल तथा स्कुटरको मूल्य बढ्छ। यो सेगमेन्टका मोटरसाइकल नेपाली बजारमा सबैभन्दा धेरै बिक्री हुँदै आएको छ।
यसैगरि नयाँ करको व्यवस्था अनुसार ५ सय सीसीदेखि ८ सय सीसी इन्जिन क्षमताका मोटरसाइकलको समेत मूल्य बढ्ने छ।
