झापा- मेची भन्सार कार्यालयले चालु आर्थिक वर्ष २०८१/८२ को पहिलो दुई महिनामा दुई अर्ब ४२ करोड नौ लाख नौ हजार रूपैयाँ राजस्व संकलन गरेको छ। उक्त राजस्व रकम कार्यालयको वार्षिक लक्ष्यको १३ दशमलव ९६ प्रतिशत हो।
चालु आवमा कार्यालयले १७ अर्ब ३४ करोड ४६ लाख २५ हजार रूपैयाँ राजस्व संकलन गर्ने लक्ष्य राखेको भन्सार अधिकृत एवं सूचना अधिकारी गणपति कँडेलले जानकारी दिए।
उनका अनुसार गत साउन र भदौमा सबैभन्दा बढी पेट्रोलियम पदार्थको आयातबाट एक अर्ब ३८ करोड ३९ लाख चार हजार रूपैयाँ राजस्व संकलन भएको हो।
कार्यालयले गत आव २०८०/८१ मा १८ अर्ब २५ करोड ७८ लाख ६८ हजार रूपैयाँको लक्ष्य राखकामा लक्ष्यको ७८ दशमलव चार प्रतिशत राजस्व संकलन गरेको थियो।
चालु आवमा गत आवको भन्दा ९१ करोड ३२ लाख ४३ हजार रूपैयाँले राजस्वको लक्ष्य घटाएको छ। रासस
