पर्सा- वीरगञ्ज भन्सार कार्यालयले चालु आर्थिक वर्षको भदौसम्म २५ अर्ब ४० करोड ३१ लाख ४३ हजार रूपैयाँ राजस्व संकलन गरेको छ। 

भन्सार विभागले भदौसम्म ३५ अर्ब ५७ करोड २७ लाख ५६ हजार रूपैयाँ राजस्व संकलनको लक्ष्य निर्धारण गरेकामा ७१ प्रतिशत लक्ष्य हासिल भएको कार्यालयले जनाएको छ।

भन्सार कार्यालयका प्रमुख भन्सार प्रशासक दीपक लामिछानेले गत वर्षको सोही अवधिको तुलनामा चालु आवमा झण्डै एक अर्ब रूपैयाँले राजस्व बढेको जानकारी दिए। गत आवको भदौसम्म ३५ अर्ब ४४ लाख ४२ हजार रूपैयाँ राजस्व संकलन गर्ने लक्ष्य लिइएकामा ७० प्रतिशत अर्थात् २४ अर्ब ५७ अर्ब ९२ लाख ५७ हजार रूपैयाँ राजस्व संकलन भएको थियो।

प्रशासक लामिछानेका अनुसार सो अवधिमा कार्यालयबाट सबैभन्दा धेरै पेट्रोलियम पदार्थ आयात भएको जानकारी दिए। 'विगतका वर्षमा वीरगञ्ज भन्सार कार्यालय हुँदै पेट्रोलियम पदार्थका सवारीसाधन धेरै आयात हुने गरेकामा यसपटक विद्युतीय सवारीको सङ्ख्या बढेको छ', उनले भने।

भन्सार विभागले गत साउनमा १६ अर्ब ८६ करोड ८७ लाख रूपैयाँ संकलनको लक्ष्य लिए पनि १२ अर्ब १६ करोड ३२ लाख ५८ हजार रूपैयाँ राजस्व संकलन गरेको थियो। कार्यालयका अनुसार गत आवको साउनमा १८ अर्ब ७० करोड ४० लाख रूपैयाँ राजस्व संकलनको लक्ष्य लिइएकोमा १३ अर्ब २३ करोड ९८ लाख रूपैयाँ राजस्व संकलन भएको थियो। रासस