काठमाडौं- लगातार बढेको सेयर बजारमा बुधबार ‘ब्रेक’ लागेको छ। झन्डै दुई साता अगाडिदेखि बढीरहेको सेयर बजारमा बुधबार करेक्सन आएको हो। 

बैंकलाई तिर्ने किस्ता र ब्याजको दबाबबीच पुस अन्तिम साता सेयर बजार लगातार उकालो लागेको थियो। बैंकमा लगानीयोग्य रकम बढ्न थालेपछि सेयर बजारमा प्रभाव परेको हो। 

दुई सातादेखि लगातार बढ्न थालेको सेयर बजार यो साताको तेस्रो दिनसम्म बढेको थियो। यो साताको चौथो दिन भने सेयर बजार घटेको हो।

बुधबार ३०.५१ अंकले घटेर २८०३.६२ बिन्दुमा झरेर छ। बुधबार कारोबार रकममा भने सुधार भएको छ। १ करोड ६१ लाख कित्ता सेयर कारोबार हुँदा बुधबार ८ अर्ब ३३ लाख रूपैयाँको कारोबार भएको छ। २९ कम्पनीको सेयर मूल्य बढ्दा १५८ कम्पनीको सेयर मूल्य घटेको छ।

यसअघि आइतबार ७३.०५ अंकले बढेको बजार सोमबार १९.३४ अंकले बढेको थियो। मंगलबार ४९.१९ अंकले बढेर २८३४.१३ अंक पुगेको थियो।