काठमाडौं- बैंकलाई तिर्ने किस्ता र ब्याजको दबाबबीच पुस अन्तिम साता सेयर बजार लगातार उकालो लागेको छ। बैंकमा लगानीयोग्य रकम बढ्न थालेपछि सेयर बजारमा प्रभाव परेको छ।
दुई सातादेखि लगातार बढ्न थालेको सेयर बजार यो साताको तेस्रो दिन पनि उत्साह छाएको छ। आइतबार ७३.०५ अंकले बढेको बजार सोमबार १९.३४ अंकले बढेको थियो। मंगलबार ४९.१९ अंकले बढेर २८३४.१३ अंक पुगेको छ। ६ अर्ब ७२ करोड रुपैयाँको कारोबार भएको बजारमा १ करोड १९ लाख कित्ता सेयर कारोबार भएको छ।
१७० कम्पनीको सेयर बढ्दा १९ कम्पनीको घटेको छ। मंगलबार अधिकांश फाइनान्स कम्पनी र विकास बैंकको सेयरमा सर्किट लागेको छ। सबैभन्दा धेरै कमाउनेमा नारायणी डेभलपमेन्ट बैंकका लगानीकर्ता रहेका छन्। त्यस्तै पोखरा फाइनान्स र नेपाल फाइनान्सको सेयरमा समेत सर्किट लागेको छ।
३२ सयबाट बजार धेरै तल झरेकोले सेयर बजार अब फेरि सोही उचाइतर्फ लागेको सेयर विश्लेषक ताराप्रसाद फुलेल बताउँछन्। ‘बजार आवश्यकभन्दा धेरै घटेको थियो, घट्ने बढ्ने स्वभाविक नै हो,’ विश्लेषक फुलेलले भने। २२ सयबाट पुन: बढ्न थालेकोले अब ३२०० माथि बजार जाने उनको दाबी छ।
