काठमाडौं- व्यवसायी मीनबहादुर गुरुङले भाटभटेनी विस्तारको कामलाई निरन्तरता दिँदै आएका छन्।

गएको २४ गते पोखराको तालचोकमा २८ ‌औँ शाखा शिलान्यास गरेको तीन दिनमै गुरुङले चितनवको रत्ननगर नगरपालिका-३ टाँडीमा २९ औँ शाखा शिलान्यास गरेका हुन्। गुरुङले बुधबार भाटभटेनीको २९ ‌औँ शाखाको भवन निर्माणका लागि जगपूजा गरेका छन्।

टाँडीमा निर्माण हुने भाटभटेनीको २९ औँ शाखा ३ लाख ३२ हजार स्क्यावर फिटमा निर्माण हुने गुरुङले जनकारी दिए।

शाखा निर्माण क्षेत्रको कुल क्षेत्रफल दुई बिगाहा रहेको छ। २९ औँ शाखामा फिलिम हल, फुड कोर्ड र बालालिका लागि खेल मैदान क्षेत्रसमेत निर्माण हुने छ। भवन वेसमेन्टसहित ७ तलाको हुने छ।

भवन निर्माणको लगानी दुई अर्ब रुपैयाँ लगानी हुने गुरुङले जानकारी दिए। यो शाखा १२ देखि १४ महिनामा सञ्चालनमा आउने उनले बताए।

नयाँ शाखामा ५ सय जनाले रोजगारी पाउने छन्। योसँगै चितवनमा भाटभटेनीको दुईवटा शाखा हुने छ। यसअघि चितवनको भरतपुर बजारमा भाटभटेनी सञ्चालनमा आइसकेको छ।

नियमित रुपमा शाखा विस्तारको काम भएको गुरुङको भनाइ छ। अहिले काठमाडौं, ललितपुर, भक्तपुर, भरतपुर, बुटवल, नेपालगञ्ज, विराटनगर, जनकपुर, वीरगञ्ज सहरमा भाटभटेनी विस्तार भइसकेको छ।