काठमाडौं- वैदेशिक रोजगारमा इटाली तथा क्यानडा पठाइदिने भन्दै विभिन्न व्यक्तिहरूबाट १ करोड ७४ लाख रुपैयाँ ठगी गरेको अभियोगमा प्रहरीले दुईजनालाई पक्राउ गरेको छ।
पक्राउ पर्नेमा डडेलधुराको नवदुर्गा गाउँपालिका-४ घर भइ हाल काठमाडौं महानगरपालिका-२९ अनामनगर बस्ने ३४ वर्षीय कर्णसिंह साउद तथा रोल्पाको माडी गाउँपालिका-१ जवाड घर भइ हाल कलंकी बस्ने २९ वर्षीय रणबहादुर घर्ती रहेका काठमाडौं उपत्यका अपराध अनुसन्धान कार्यालयका सूचना अधिकारी एवं प्रहरी उपरीक्षक काजीकुमार आचार्यले जानकारी दिए।
उनका अनुसार साउदले इटाली पठाउने भन्दै आठ जनाबाट ९ लाख तथा घर्तीले शिवराम थापासमेत आठ जनालाई क्यानडा पठाउने भन्दै पीडितहरूबाट पटकपटक गरी १ करोड ६५ लाख रकम लिइ सम्पर्कविहीन भएको उजुरीका आधारमा उनीहरूलाई पक्राउ गरिएको हो।
साउदलाई मंगलबार काठमाडौं महानगरपालिका-२८ बागबजार तथा रणबहादुर घर्तीलाई काठमाडौं महानगरपालिका-१६ वनस्थलीबाट सोमबार पक्राउ गरिएको प्रहरीले जनाएको छ।
पक्राउ परेका दुवैजनालाई आवश्यक कारबाहीको लागि वैदेशिक रोजगार विभाग ताहचल पठाइएको उपत्यका अपराध अनुसन्धान कार्यालयले जनाएको छ।
