काठमाडौं- नेपाल स्टक एक्सचेन्ज (नेप्से)को प्रमुख कार्यकारी अधिकृत नियुक्तिको लागि तीन जनाको नाम मन्त्रिपरिषद्को बैठकमा पेश हुने भएको छ। अर्थ मन्त्रालयले गठन गरेको छनौट तथा सिफारिस समितिले तीन जनाको नाम सिफारिस गरेको हो।
समितिले आवेदन दिने ११ जनामध्ये कृष्ण बहादुर कार्की, डा. केशव प्रसाद श्रेष्ठ, प्रविण पन्दाक, रमेश घिमिरे र डा. रमेशकुमार भण्डारीको नाम सर्टलिस्ट गरेको थियो। पाँच जनामध्येबाट कार्ययोजनाको प्रस्तुतीकरण तथा अन्तरवार्ताका आधारमा कृष्णबहादुर कार्की, डा. केशव श्रेष्ठ र डा. रमेशकुमार भण्डारीको नाम मन्त्रिपरिषद्मा सिफारिस गरेको हो। मन्त्रिपरिषद्ले एक जनालाई चार वर्षका लागि नेप्सेको कार्यकारी अधिकृतमा छनोट गर्नेछ।
सीईओ बन्नका लागि जम्मा ११ जनाले आवेदन दिनेमा नेप्सेका हालका कायम मुकायम प्रमुख कार्यकारी अधिकृत निरन्जन फुयाल, उपप्रबन्धक प्रविण पन्दाक, जीवन अमगाई, डा रमेश कुमार भण्डारी, केशव प्रसाद श्रेष्ठ, रमेश घिमिरे, कृष्ण बहादुर कार्की, दिपक गौतम, गोविन्द प्रसाद दाहाल, बद्री प्रसाद प्याकुरेल, र छवीराज पन्त रहेका थिए।
सर्वोत्तम सिमेन्टको सेयर खरिद प्रकरणमा नेप्सेका तत्कालीन सीईओ चन्द्रसिंह साउदले आफ्नो पदबाट राजीनामा दिएका थिए। त्यसपछि खाली रहेको पदमा नयाँ नियुक्त गर्न छनोट समिति बनाएर उम्मेदवारी माग गरिएको थियो।
यता नेपाल धितोपत्र बोर्डमा भने अझै प्रक्रियाले मूर्त रुप लिन सकको छैन।
