काठमाडौं- नारायणहिटी दरबार संग्रहालयमा बतास समूहले कफी सप सञ्चालनका लागि सम्झौता भएकोभन्दा बढी जग्गा लिएर संरचना बनाएको खुलेको छ।
ठेक्का तथा निर्माण भएको संरचनाको विषयलाई लिएर संस्कृति, पर्यटन तथा नागरिक उड्डयन मन्त्रालयले छानबीन समिति बनाएको थियो।
मन्त्रालयका सहसचिव होमप्रसाद लुइटेलको संयोजकत्वमा बनेको तीन सदस्यीय समितिले रिपोर्ट तयार गरेको छ। जसमा बतासले नारायणहिटीमा सम्झौताभन्दा बाहिर गएर संरचना बनाएको समितिले ठहर गरेको छ।
ठेक्का हुँदा दरबारभित्र करिब ६ आनामा बनको रातो एक तले घरमा कफी सफ सञ्चालन गर्नेगरी भएको थियो। पछि बतासले ठेक्का पाएपछि बाहिर पनि संरचना बनाएर सम्झौताभन्दा बाहिर गएर ब्यापार गर्न खोजको निष्कर्ष निकालेको छ।
बतासले अहिले १४ रोपनीभन्दा बढी जग्गा प्रयोग गरेको निष्कर्ष निकालेको छ। तर जग्गा भाडा प्रक्रिया भने सही नै रहेको ठहर गरेको छ।
नारायणहिटी दरबारभित्र चिया तथा कफी सप सञ्चालन गर्ने दिने गरी २०७७ साउनमा ठेक्का भएको थियो। सोहीअनुसार २०७७ पुसमा ८ गते आशयपत्र जारी भएको थियो।
