काठमाडौं- सरकारले नेपाल टेलिकमको प्रबन्ध निर्देशकमा संगीता पहाडीलाई नियुक्त गरेको छ।

आज बसेको मन्त्रिपरिषदको बैठकले पहाडीलाई प्रबन्ध निर्देशक नियुक्त गरेको एक मन्त्रीले जानकारी दिए। 

टेलिकमको कायमुकायम प्रबन्ध निर्देशक रहेकी पहाडीलाई सरकारले प्रबन्ध निर्देशक नियुक्त गरेको हो। उनी नेपाल टेलिकमको दोस्रो महिला प्रबन्ध निर्देशक पनि हुन्। यसअघि कामिनी राजभण्डारी प्रबन्ध निर्देशक नियुक्त भएकी थिइन्।

माओवादी नेतृत्वको सरकार हुँदा नै टेलिकमको प्रबन्ध निर्देशक नियुक्तिको प्रक्रिया अघि बढेको थियो। तत्कालीन सचिव रामकृष्ण सुवेदीले नै सिफारिस गरेकामध्येबाट अहिलेको सरकारले प्रबन्ध निर्देशक नियुक्त गरेको हो। 

यसअघिका प्रबन्ध निर्देशक सुनिल पौडेलल श्रृखलाबद्ध भ्रष्टाचार मुद्दा लागेर केही अभियोगमा दोषी ठहरसमेत भइसकेका छन्।

भ्रष्टाचारमा दोषी ठहर भएपछि पौडेलालई सरकारले बर्खास्त गरेको थियो। पौडेल बाहिरिएसँगै पहाडीले नै कामुको जिम्मेवारी सम्हाल्दै आएकी थिइन्। 

टेलिकमकै क्याडर भएकाले पहाडीलाई काम गर्न सहज हुने अनुमान गरिएको छ।