तनहुँ- पृथ्वीराजमार्गमा पर्ने तनहुँको आँबुखैरेनी ऐना पहरामा भारतीय नम्बर प्लेटको बस मस्याङ्दी नदीमा बस खसेको छ। आँबुखैरेनी गाउँपालिका-२ स्थित ऐना पहराबाट यात्रुबाहक बस अघि मर्स्याङ्दी नदीमा खसेको हो।
प्रहरीका अनुसार दुर्घटनामा परी १४ जनाको मृत्यु भएको छ। दुर्घटनामा परेका १६ यात्रुको उद्धार गरिएको छ।
पोखराबाट काठमाडौंतर्फ जाँदै गरेको युपी ५३ एफटी ७६२३ नम्बरको बस नदीमा खसेको तनहुँका प्रहरी नायव उपरीक्षक दीपककुमार रायले जानकारी दिए। उनका अनुसार बसमा भारतीय पर्यटक रहेका थिए।
अहिले सशस्त्र प्रहरी बलको गोताखोर टोलीले घटनास्थलमा यात्रुको उद्धार गरिरहेको छ। यात्रुको उद्धारका लागि १० जनाको गोताखोर टोली घट्नास्थलमा परिचालन गरिनुका साथै घाइतेलाई अस्पताल लैजाने कार्य जारी रहेको सशस्त्र प्रहरीका सहप्रवक्ता एवं प्रहरी नायव उपरीक्षक शैलेन्द्र थापाले जानकारी दिए।
अप्ठ्यारो भीर भएका कारण घाइतेको उद्धारमा कठिनाइ भइरहेको उनले बताए। उद्धार कार्यमा नेपाली सेना, नेपाल प्रहरी र सशस्त्र प्रहरी बल खटिएको छ। बसमा झण्डै ४० भारतीय यात्रु सवार रहेको बताइएको छ। रासस
