काठमाडौं- जीवन विकास लघुवित्तको लाभांशको विषयमा लामो समयदेखि लगानीकर्ताहरू माझ छलफल चालिरहेको छ। कम्पनीले दिने लाभांशको विषयमा अनेकौं आँकलन भइरहेको छन्। तर कम्पनीले अहिलेसम्म लाभांशको विषयमा कुनै निर्णय गरेको छैन।

महिला लघुवित्तले ५० प्रतिशत लाभांश घोषण गरेसँगै लगानीकर्ताहरूले जीवनले योभन्दा बढी दिने आँकलन गरिरहेका छन्। लाभांश वितरण गर्न बाँकी जीवन विकास लघुवित्त वित्तीय संस्थाको चुक्ता पुँजी ६० करोड ८४ लाख रुपैयाँ रहेको छ भने जगेडा कोषमा एक अर्ब ३० करोड रुपैयाँ रहेको छ।

गत आर्थिक वर्षको चौथो त्रैमासिक अवधिको नाफा भने ६८ करोड ९५ लाख रुपैयाँ थियो। उक्त नाफाका आधारमा संस्थाको प्रतिसेयर आम्दानी ११३ रुपैयाँ रहेको छ। 

तुलनात्मक रुपमा अन्य लघुवित्तको भन्दा जीवन विकास चुक्ता पुँजी, जगेडा कोष, नाफा र प्रतिसेयर आम्दानी राम्रो छ। जीवन विकासको प्रतिसेयर नेटवर्थ ३१५ रुपैयाँ छ।

एक वर्षको अवधिमा दोस्रो बजारमा भएको कारोबारलाई हेर्ने हो भने जीवन विकासकै सर्वाधिक धेरै रहेको थियो। दोस्रो बजारमा संस्थाको सेयर सूचीकृत पछि जीवन विकासको सेयर मूल्य सर्वाधिक ५७४९ रुपैयाँसम्म पुगेको थियो। 

जीवन विकासले पनि बम्पर लाभांश घोषणा गर्न सक्ने अनुमानसँगै सँगै प्रतिकित्ता ३८ सय भन्दा तल आएको सेयर अहिले ४५ सय रुपैयाँ नजिक पुगेको छ। अहिले बजारमा जीवन विकासले ७० प्रतिशतसम्म लाभांश दिने अनुमान गरिएको छ।