सर्लाही- यातायात व्यवस्था कार्यालय मलंगवाले गत आर्थिक वर्ष २०८०/८१ मा ६ करोड बढी राजस्व संकलन गरेको छ।

गत आवमा यस कार्यालयले ६ करोड ३६ लाख ५८ हजार ९१ रूपैयाँ बराबरको राजस्व संकलन गरेको कार्यालय प्रमुख राकेशकुमार यादवले जानकारी दिए। उनका अनुसार यस कार्यालयमा भाडाका सवारीबाट आय करबापत १४ लाख १५ हजार पाँचसय रूपैयाँ राजस्व संकलन भएको छ।

यस्तै पटके, रुट परमिटलगायत कारबाहीबाट दुई लाख ९२ हजार आठ सय ४०, चालक अनुमतिपत्र र सवारी दर्ता किताब नवीकरणबापत एक करोड ४६ लाख ३८ हजार तीन सय १५ संकलन भएको कार्यालय प्रमुख यादवले बताए। सवारीसाधन करबाट चार करोड ७३ लाख ११ हजार चार सय ३६ राजस्व संकलन भएको कार्यालयले जनाएको हो।

कार्यालयले गत आवको चैत मसान्तको एक दिनमा ७० लाख रूपैयाँभन्दा बढी राजस्व संकलन गरेको थियो। समयमै सवारी किताब नवीकरण नगरेका तथा सवारी कर नतिरेका सेवाग्राहीलाई मधेस प्रदेश सरकारले जरिवाना रकम मिनाहा गरेको थियो। जरिवाना मिनाहासम्बन्धी ढिला गरेर जानकारी पाएका सेवाग्राहीको राति १२ बजेसम्म मलंगवा कार्यालयमा भीड लागेको थियो। उक्त दिन ७० लाख रूपैयाँभन्दा बढी राजस्व संकलन गरेको कार्यालय प्रमुख यादवले बताए।

'हामीले चैत मसान्तमा एकै दिन ७० लाख रूपैयाँसम्म राजस्व संकलन गरेका थियौँ', उनले भने, 'राति १२ बजेसम्म कार्यालयमा बसेर सेवा दिएका थियौँ। जेठ ४ गतेबाट चालक अनुमतिपत्र परीक्षा (ट्रायल)समेत सुरु गरेका छौँ। यसले सेवाग्राहीलाई थप सुविधा पुगेको छ भने राजस्व संकलन दायरा फराकिलो भएको छ।'

विसं २०८० साल मङ्सिर २७ गते स्थापना भइ यस कार्यालयले सेवा प्रारम्भ गरेको हो। हरिवन नगरपालिका-३ निवासी रमा कोइरालाले यातायात सेवा कार्यालयको सेवा प्रभावकारी भएको जानकारी दिए। यसभन्दा अगाडि यातायातसम्बन्धी सेवाका लागि यहाँका सेवाग्राहीलाई वीरगञ्ज, जनकपुर, बर्दिबाससम्म धाउनुपर्ने बाध्यता थियो। रासस