काठमाडौं- ललितपुरको महांकाल गाउँपालिकाले दूध एवम् दुग्धजन्य पदार्थ बिक्रीवितरणमा कर लगाएको छ।
गाउँपालिका क्षेत्रभित्र व्यावसायिक र गैरव्यावसायिक रुपमा पशुपालन गर्दै आएका कृषकहरुबाट उत्पादित दूध तथा दुग्धजन्य पदार्थ संकलन केन्द्र, डेरी उद्योग, ढुवानीकर्ताले यही साउनदेखि नै अनिवार्यरुपमा कर तिर्नुपर्ने व्यवस्था गरिएको हो।
गाउँपालिकाको गाउँसभाबाट स्वीकृत आर्थिक ऐन, २०८१ अनुसार दूध तथा दुग्धजन्य पदार्थ बिक्री वितरणमा ०.२० पैसा प्रतिलिटरका दरले कर अनिवार्य गर्ने व्यवस्था गरेको थियो। सोही व्यवस्थाअनुसार ०८१ साउनबाट अनिवार्यरुपमा कर असुल गरिने गाउँपालिकाका अध्यक्ष गणेशबहादुर केसीले जानकारी दिए।
साथै, दर्ता हुन छुट भएका संस्थाहरुले यथाशीघ्र दर्ता प्रक्रिया अघि बढाइ आफूले संकलन गरेको दूधको परिमाणअनुसार हरेक महिनाको बुझाउनुपर्ने रकम दोस्रो महिनाको पहिलो साताभित्र बुझाउन गाउँपालिकाले सूचित गरेको छ।
समयमै दर्ता नभए गाउँपालिका वा अन्यत्र निकायबाट प्रदान गरिने अनुदान प्राप्त नहुने गाउँपालिकाले जनाएको छ।
