स्याङ्जा- जिल्लाको वालिङमा रहेको त्रियासी कृषि उपज तथा बजार व्यवस्थापन सहकारीले एक वर्षमा ६७ लाख रूपैयाँभन्दा बढीको सागसब्जी बिक्री गरेको छ। वालिङ नगरपालिका-१ त्रियासीमा रहेको सहकारीले गत आर्थिक वर्ष २०८०/८१ मा ६७ लाख २५ हजार दुई सय ९९ रूपैयाँ सागसब्जी बिक्री गरेको हो।

सहकारीमा आबद्ध भएका कृषक सेयर सदस्यहरुले आ-आफ्नो खेतबारीमा उत्पादन भएका सागसब्जी सहकारीले संकलन गरी बिक्री गर्दै आएको सहकारीका अध्यक्ष अर्जुनप्रकाश अर्यालले बताए। 'यहाँका कृषकले ठूलो परिमाणमा विभिन्न प्रजातिका सागसब्जी र फलफूल उत्पादन गरी सहकारीमा ल्याउनुहुन्छ', उनले भने, 'सहकारीले स्थानीय बजारका साथै पोखरा, बुटवल, काठमाडौं लगेर बिक्री गर्न समन्वय गरिरहेको छ।'

कृषकले उत्पादन गरेका सागसब्जीलाई बजार समस्या नरहेको बताउँदै अध्यक्ष अर्यालले उत्पादित सागसब्जी र फलफूलहरु सहकारीको संकलन केन्द्रमा राखेर बिक्री गर्दै आएको जानकारी दिए। 'कृषकबाट संकलन गरिएका कृषि उपज केन्द्रमा संकलन गरी राख्छौँ। स्थानीय व्यापारी यहाँ आएर खरिद गरेर लैजानुहुन्छ', उनले भने, 'ठूलो परिमाणमा उत्पादन हुँदा सहकारीको सवारीसाधनमार्फत स्याङ्जा, बुटवल, पोखरालगायत सहरका बजारमा लगेर बिक्री गर्दै आएका छौँ।'

कृषकले केन्द्रमा सागसब्जी, फलफूल तथा अन्य कृषि उपज ल्याएपछि सोको विवरण सहकारीका कर्मचारीले लिने गरेका बताउँदै अध्यक्ष अर्यालले बिक्रीपछि आम्दानी सहकारीमा रहेको कृषकको खातामा राखिदिने व्यवस्था गरिएको जानकारी दिए। उनका अनुसार सहकारीले कृषि उपजको परिमाणका आधारमा प्रतिकिलो तीन रूपैयाँ खर्च कटाउँदै आएको छ।

कटौती गरिएको रकमबाट कृषकलाई आयमूलक सीप विकासका लागि विभिन्न तालिम, गोष्ठी तथा अवलोकन भ्रमण गराउने, सहकारीको कार्यक्षेत्रभित्र सिँचाइ, कृषि सडक विस्तार र स्तरोन्नति गर्ने, साना कृषकको आर्थिक तथा सामाजिक स्थितिमा सुधार ल्याउने कार्यमा प्रयोग गरिँदै आइएको सहकारीका अध्यक्ष अर्यालले उल्लेख गरे।

'सहकारीमार्फत कृषकहरुलाई आवश्यक पर्ने सेवा सुविधा उपलब्ध गराउने सरोकार भएका निकायसँग सम्पर्क गराउँदै व्यावसायिक क्षमता विकासमा सहयोग पुर्‍याउँदै आएका छौँ', उनले भने, 'कृषकलाई समूहमा आबद्ध गराइ सरल, सुलभ र प्रभावकारी ढंगले कृषि कर्जा वितरण गरिरहेका छौँ।'

उत्पादित सागसब्जीको बिक्रीमा बजारको समस्या नभएको यहाँका अगुवा कृषक लीलाबल्लभ काफ्लेले बताए। गत आवमा तीन लाख रूपैयाँभन्दा बढीको सागसब्जी सहकारीमा बिक्री गरेको उनले जानकारी दिए। 'चौध रोपनी क्षेत्रफलमा गोलभेँडा, काक्रा, बोडी, बोडा, घिरौँला, करेला, बन्दा, काउली उत्पादन गरी बिक्री गर्दै आइरहेको छु', उनले भने, 'घरबाटै बिक्री गर्नेभन्दा सहकारीमार्फत गर्दा सहज हुनाका साथै एकैमुस्ट रकम प्राप्त हुन्छ।'

उत्पादित कृषि उपज सहकारीमा लगेर तौलेर छोडेपछि बजार मूल्यका आधारमा सहकारीमा रहेको आफ्नो खातामा रकम आउने काफ्लेले उल्लेख गरे। 'हामीले सहकारीमा लगेर छोडेको सागसब्जी तथा फलफूल सहकारीले बिक्री गर्छ', उनले भने, 'बिक्री गरेर आएको रकम खातामा जम्मा हुन्छ, जहिले आवश्यक पर्छ सोही बेला निकाल्न सकिन्छ।'

वालिङ-१ त्रियासीका ६० वर्षीय भूमिनन्द रेग्मीले २४ वर्षदेखि व्यवसायिकरुपमा सागसब्जी र फलफूल उत्पादन गर्दै आएका छन्। उनले पनि सहकारीमार्फत बिक्री गरी पुरस्कृतसमेत भएको बताए।

'सहकारीमा सबैभन्दा बढी कृषि उपज संकलन गरेर पुरस्कृत हुँदै आएको छु', कृषक रेग्मीले भने, 'सागसब्जी र फलफूल खेतीबाट वार्षिक तीन लाख रूपैायाँभन्दा बढी आम्दानी हुन्छ। ६ रोपनी क्षेत्रफलमा मौसमी तथा बेमौसमी सागसब्जी उत्पादन गर्दै आइरहेको छु।' उनले गत आवमा तीन लाख रूपैयाँ मूल्य बराबरको साजगब्जी र तरकारी बिक्री गरेको जानकारी दिए।

सहकारीले प्रत्येक वर्ष धेरै परिमाणमा कृषि उपज संकलन गराउने कृषकलाई पुरस्कृत गर्दै आइरहेको जनाएको छ। उत्पादित सागसब्जी र फलफूल आइतबार, मंगलबार र बिहीबार केन्द्रमा संकलन गरी बिक्री गर्दै आइएको सहकारीका प्रबन्धक सगुन खाँणले बताए। रासस