म्याग्दी- म्याग्दीको मालिका, मंगला र धवलागिरी गाउँपालिकाका नौसय ५० घरधुरीमा निजी धारा जडान गरेर खानेपानी पहुँच विस्तार गरिएको छ। नेपाल स्वास्थ्यको लागि पानी (नेवा), स्थानीय तह र समुदायको लागत साझेदारीमा निर्माण भएका आयोजनाहरुबाट सात हजार सात सय ६२ जनसंख्या लाभान्वित भएका छन्।
कुल पाँच करोड ९१ लाख ४५ हजार आठ सय २९ रूपैयाँको लागतमा खानेपानी आयोजनाहरु निर्माण भएका नेवाको गण्डकी प्रदेश कार्यालयले जनाएको छ। नेवाका प्रदेश प्रमुख रमेश दाहालका अनुसार आयोजनाको कार्यक्षेत्रका सबै घरधुरीमा निजी धाराका साथै विद्यालय, स्वास्थ्य संस्था र सामुदायिक भवनमा पनि थप १९ धारा जडान गरिएको छ।
मालिका गाउँपालिका-२ को ठूलोरुममा दुई सय ७०, कलात भनारीमा ७३ र बिलवाङमा ६४ घरधुरीमा ‘एक घर, एक धारा’ जडान गरिएको मालिका-२ का वडाध्यक्ष उदय बुढाथोकीले जानकारी दिए। मालिकाकाको बिम डाँडागाउँ, दास, सिरेदी खोप्टी र जनप्रिय माध्यमिक विद्यालयमा निर्माण भएको खानेपानी आयोजनाबाट २३६ धारा जडान भएको छ। धवलागिरी गाउँपालिका-२ को लमसुङ र वडा नं. ४ खाम्लामा १०८ घरधुरीमा खानेपानी जडान भएको छ।
मंगला- १ खानीगाउँमा ३७, वडा नं. २ खुम्लीया, र्यालेखोर, भाइवाङका १०० र हिदीका ६४ घरमा निजी धारा जडान भएको नेवाका प्राबिधिक गोर्खबहादुर शाहीले बताए। नेवाले दुई करोड ८९ लाख ७० हजार नौ सय ५१ रूपैयाँ र स्थानीय तहहरुले एक करोड २५ लाख ९३ हजार २३ रूपैयाँ लगानी गरेका छन्।
एक करोड ४८ लाख ६६ हजार चार सय ४० रूपैयाँ बराबरको श्रमदान गरेका उपभोक्ताहरुले २७ लाख १५ हजार चार सय १५ रूपैयाँ नगद लगानी गरेका नेवाले जनाएको छ। हिदी खानेपानी उपभोक्ता समितिका अध्यक्ष दलबहादुर पुनले घरघरका धारामा पानी आउन थालेपछि सार्वजनिक धारा, कुवा, पधेरामा धाउदा हुने समयको बचतको साथै सहज भएको बताए।
व्यवस्थित रुपमा वितरण भएपछि पानीको मितव्ययी प्रयोग हुन थालेको छ। पानीका कारणले समाजमा विवाद हुन छाडेको छ। सबैले आवश्यकता अनुसार भनेको समयमा पानी प्रयोग गर्न पाएका छन्। रासस
