काठमाडौं- फेदीखोला जलविद्युत आयोजनामा राष्ट्रिय वाणिज्य बैंकले ऋण लगानी गर्ने भएको छ।
फेदीखोला हाइड्रोपावर कम्पनी प्रालि र राष्ट्रिय वाणिज्य बैंकबीच बिहीबार ४.३ मेगावाटको फेदीखोला (थुम्लुङ) आयोजनामा ऋण लगानी गर्ने सम्झौता भएको हो। वाणिज्य बैंकका पूर्वाधार बैंकिङ विभाग प्रमुख दामोदर ज्ञावाली र फेदीखोला हाइड्रोका प्रबन्ध सञ्चालक प्रकाशचन्द्र दुलालले हस्ताक्षर गरेका छन्।
सम्झौताअनुसार कम्पनीले भोजपुरको साल्पासिलिछो गाउँपालिका-६ मा निर्माण गरिरहेका फेदीखोला आयोजनामा ५० करोड रूपैयाँ राष्ट्रिय वाणिज्य बैंकले ऋण लगानी गर्नेछ।
कुल लागत ९४ करोड रहेको यस आयोजनामा ४४ करोड स्वपुँजी लगानी गर्ने कम्पनीले जनाएको छ।
कम्पनीका अनुसार यही साउनको अन्त्यसम्ममा कम्पनीलाई प्राइभेट लिमिटेडबाट लिमिटेडमा परिवर्तन गरी स्वपुँजीको ४४ करोडको ३० प्रतिशत अर्थात् १३ करोड २० लाख आईपीओ निष्कासन यो आवभित्रमा गरिने लक्ष्य रहेको छ।
२०८२ असोजभित्र सम्पन्न हुने यस आयोजनाका लागि आवश्यक सम्पूर्ण जग्गा खरिद, कन्ट्रकसन पावर जडान, पहुँचमार्ग निर्माण, गोदाम घर, आवास गृह आदिको निर्माण सम्पन्न भइसकेको कम्पनीले जनाएको छ।
अहिलेसम्म करिब ३० प्रतिशत काम सम्पन्न भएको कम्पनीले जनाएको छ।
