काठमाडौं- साताको पहिलो दिन नै सेयर बजार भारी अंकले बढेको छ। गत साता उतार चढावमै वितेको भएपनि यो साताको पहिलो दिन आइतबार भने बजारले सुखद सुरुवात गरेको हो। 

आइतबार नेप्सेपरिसूचक ६०‍.४१ अंकले बढेर २५८४.९१ बिन्दुमा पुगेको हो। ७१ लाख ६० हजार कित्ता सेयर किनबेच हुँदा ४ अर्ब १२ करोड रुपैयाँको कारोबार भएको हो। १६८ कम्पनीको सेयर मूल्य बढ्दा १८ कम्पनीको भने सेयर मूल्य घटेको हो।

गत साताभरमा बजार जम्मा ४ अंकले मात्रै बढेको थियो। अघिल्लो साता भने बजार २ सय अंकभन्दा बढीले बढेको थियो। 

सेयर विश्लेषकहरूले सेयर बजारमा उच्च अंकबाट धेरै तल झरिसकेकोले अब बजार बढ्ने दाबी गरेका छन्। उनीहरूले बजार बेयरिसमा नगएकोले पुनः माघ लागेपछि बजारले गति लिने समेत बताएका छन्। 

आइतबार बजार बढेको भएपनि व्यापक उतारचढाव हुने नदेखिएको सेयर विश्लेषक अम्बिका प्रसाद पौडेल बताउँछन्। ‘बजार अहिले पनि बेयरिसमा गएको छैन,’ उनले भने, ‘पुसको अन्तिम साता वा माघको पहिलो सातापछि मात्रै बजारको अवस्थामा आँकलन गर्न सकिने छ। अहिले नै केही भन्न सक्ने अवस्था छैन।’ 

बजारमा अहिले ठूलो उत्तरचढाव देखिने अवस्था नहरेको उनको तर्क छ। माघको पहिलो साता वा पुसको अन्तिम सातामा मात्रै बजारले लिने अबको बाटोका विषयमा विश्लेषण गर्न सकिने पौडेल बताउँछन्।

तरलता अभावको विषय कसरी सम्बोधन हुन्छ, बैंकको ब्याजदर स्थिर रहन्छ कि बढ्छ जस्ता विषयले अहिले नै बजारको विषयमा विश्लेषण गर्न नसकिने अवस्थामा पुगको हो।