काठमाडौं- अनियमितता र भ्रष्टाचारका श्रृंखलाबद्ध मुद्दा खेपिरहेका सुनिल पौडेलविरुद्ध राजस्व अनुसन्धान विभागले विदेशी विनिमय अपचलनको अभियोगमा मुद्दा दायर गरेको छ। विभागले पौडेलविरुद्ध काठमाडौं जिल्ला अदालतमा मुद्दा दायर गरेको छ।
पौडेलले अनुमति नलिइई सिंगापुरको युनाटेड ओभरसिज बैंकमा खात खोली ५८ हजार अमेरिकी डलर जम्मा गरेको पाइएको थियो। यो विदेशी विनिमय नियमित गर्ने ऐनविपरीत भएको भन्दै विभागले मुद्दा दायर गरेको हो।
विभागले पौडेलिविरुद्ध ५८ हजार डलर बराबरको ७७ लाख ४५ हजार ९०० रुपैयाँ बिगो र त्यसको तीनगुणा २ करोड ३२ लाख ३७ हजार ७०० रुपैयाँ जरिवाना माग दावी गर्दै काठमाडौं जिल्ला अदालतमा अभियोग दायर गरेको छ।
यसअघि एउटा अभियोगमा दोषी ठहर र अन्य अभियोग विचाराधीन रहेका छन्। राष्ट्रिय सूचना प्रविधि केन्द्रमा हुँदा नेसनल पेमेन्ट गेटवेको अनियमिततामा विशेष अदालतबाट दोषी ठहर भइसकेका पौडेलमाथि अख्तियारले अरु भ्रष्टाचारका विषयमा पनि अनुसन्धान गरिरहेको छ।
सुनिल पौडेलले नेपालमा मिलेमतोमा ठेक्का दिने र त्यसबापत सिंगापुरमा घुस बुझ्ने गरेको अख्तियारकै आरोपत्रमा उल्लेख गरिएको छ। यसमा चारवटा कम्पनी पौडेलका मतियारका रुपमा देखिएका छन्। अख्तियारको उक्त अनुसन्धानकै आधारमा विभागले विदेशी मुद्रा अपचलनको विषयमा थप अनुसन्धान गरेको थियो।
सुनिलले राष्ट्रिय सूचना प्रविधि केन्द्रमा १७ वर्ष बिताएका थिए। करारबाट सेवा प्रवेश गरेका सुनिल पछिल्लो समय कार्यकारी निर्देशक थिए। २०७८ सालमा सरकारले उनलाई नेपाल टेलिकमको प्रबन्धक नियुक्त गरेको थियो। प्रत्येक सरकारी प्रविधिको खरिदसँग जोडिने केन्द्रमा हुँदा सुनिलले चलाएको भ्रष्टाचारको साम्राज्यको खुलासा हुँदै गरेको छ।
