झापा- भूमिसुधार तथा मालपोत कार्यालय भद्रपुरले आर्थिक वर्ष २०८०/८१ मा ८० करोड ५८ लाख १४ हजार पाँचसय ९२ रूपैयाँ राजस्व संकलन गरेको छ। ३६ हजार आठ सय ७५ थान रजिष्ट्रेसन पारितबाट उक्त आम्दानी भएको हो।
आव २०८०/८१ मा स्थानीय तहले जग्गा वर्गीकरण गरी कित्ताकाट सुरु भएसँगै जग्गाको कारोबार बढेकाले राजस्व बढेको मालपोत कार्यालयका सूचना अधिकारी राजु दाहालले बताए।
'गत आव २०७९/८० को तुलनामा २२ करोड १२ लाख ६९ हजार एकसय ९९ रूपैयाँले राजस्व वृद्धि भएको छ', उनले भने।
गत आवमा ५८ करोड ४५ लाख ४५ हजार तीनसय ९३ रूपैयाँ राजस्व संकलन भएको थियो।
आर्थिक वर्ष २०८०/८१ मा सेवा करबापत सात करोड ५१ लाख ३९ हजार चार सय ७६, रजिष्ट्रेसन दस्तुरबाट ४७ करोड ३० लाख ३० हजार पाँच सय ५४, छुटबापत छ करोड २७ लाख ८७ हजार छ सय १२ रूपैयाँ संकलन भएको छ।
यस्तै डोर सुविधा शुल्क एक लाख ८९ हजार, पुँजीगत लाभकर ३२ करोड एक लाख २५ हजार दुईसय ६७ र विलम्ब शुल्कबापत एक लाख १७ हजार नौसय छ रूपैयाँ राजस्व संकलन गरिएको उनले जानकारी दिए। रासस
