काठमाडौं- सरकारले त्रिवि क्रिकेट मैदानलाई सुविधासम्पन्न रंगशाला बनाउने निर्णय गरेको छ।
सोमबार बसेको मन्त्रिपरिषदको बैठकले त्रिवि क्रिकेट मैदानमा दर्शकका लागि बस्ने लागि प्याराफिट, रात्रिकालीन खेलको लागि फ्लडलाइटलगायत आवश्यक संरचना बनाउने निर्णय गरेको सरकारका प्रवक्ता सञ्चार तथा सूचना प्रविधिमन्त्री पृथ्वी सुब्बा गुरुङले जानकारी दिएका छन्।
त्रिभुवन विश्वविद्यालय क्रिकेट मैदानमा फ्लडलाइट जोड्ने ठेक्का सिनामंगलको एमएसआईपीएल-एएससी पावर जेभीले पाएको छ।
यसअघिको सरकारले पनि त्रिवि मैदानमा फ्लडलाइट राख्ने काम प्राथमिकतामा रहेको जनाउँदै आएको थियो। राजनीतिक समीकरण फेरिएर नेपाली कांग्रेस र नेकपा एमालेको सरकार बनेसँगै प्रधानमन्त्री केपी शर्मा ओली नेतृत्वको मन्त्रिपरिषद्ले पनि त्रिवि मैदानलाई नै प्राथमिकतामा राखेको हो।
