काठमाडौं- हालै निर्माण सम्पन्न भएको नलिन्चोक हेलिप्याडमा उडान नगर्ने पाइलटहरूले चेतावनी दिएपछि नेपाल नागरिक उड्ययन प्राधिकरणले अध्ययन समिति बनाएको छ। 

पाइलटहरूले उठाएका सुरक्षाका प्रश्नमा आधारित भएर अध्ययन गरी सुझाव दिन भन्दै प्राधिकरणले समिति बनाएको हो।

एक हप्ताभित्र सुझावसहितको प्रतिवेदन दिनेगरी उक्त समिति बनाइएको हो। 

प्राविधिक तथा विज्ञहरू सम्मिलित समितिले सुझाव दिएपछि प्राधिकरणले थप निर्णय गर्ने भएको छ। यसअघि त्रिभुवन अन्तर्राष्ट्रिय विमानस्थलबाट हेलिकप्टर विस्थापित गर्नेगरी भक्तपुरमा हेलिप्याड निर्माण गरिएको थियो। 

सबै सुविधासहितको उक्त हेलिपोर्टमा उडानका लागि पाइलट अनिच्छुक देखिएपछि प्राधिकरणले अध्ययन समिति बनाएको हो।