काठमाडौं- कोभिडका कारण शिथिल बनेको हवाई उड्डयन क्षेत्र लयमा फर्कन थालेको छ। कोभिड महामारी सुरु भएसँगै ६ महिनासम्म बन्द भएको आन्तरिक उडान पुनः पहिलेकै अवस्थामा फर्किएको छ।
नेपाल नागरिक उड्डयन प्राधिकरणले सार्वजनिक गरेको तथ्यांक अनुसार सन् २०२१ को ११ महिनामै आन्तरिक हवाई यात्र गर्ने यात्रुको संख्या ३१ लाख १६ हजार ६ सय ७५ पुगेको छ। यो संख्या सन् २०२० को तुलनामा ११३ प्रतिशतले बढी हो। सन् २०२० मा कुल १४ लाख ५७ हजार ५ सय ३९ जनाले आन्तरिक हवाई यात्रा गरेका थिए।
यसैगरी अन्तर्राष्ट्रिय हवाई यात्रुको संख्या पनि विस्तारै बढ्न थालेको छ। प्राधिकरणका अनुसार सन् २०२१ को ११ महिनामा १२ लाख ८० हजार २ सय २१ जनाले अन्तर्राष्ट्रिय हवाई यात्रा गरेका छन्। सन् २०२० अन्तर्राष्ट्रिय हवाई यात्रा गर्ने यात्रुको संख्या ११ लाख ५ हजार १ सय ५९ थियो।
