काठमाडौं- नेपाल स्टक एक्सचेञ्ज (नेप्से) ले बुधवार तीनवटा कम्पनीको बोनस सेयरको मूल्य समायोजन गरेको छ। नेप्सेले नेपाल पुनर्बीमा कम्पनी, उन्नति सहकार्य लघुवित्त वित्तीय संस्था र मितेरी डेभलपमेन्ट बैंकको मूल्य समायोजन गरेको हो।
तीनै ओटा कम्पनीले लाभांश तथा साधारण सभा प्रयोजनार्थ बुधवार बुकक्लोज गरेसँगै नेप्सेले सेयरमूल्य समायोजन गरेको हो।
नेप्सेले नेपाल पुनर्बीमा कम्पनीको १६ दशमलव ५० प्रतिशत बोनस सेयरको समायोजनपछि सेयरमूल्य १ हजार १०४ दशमलव ७२ तोकेको छ। कम्पनीको अघिल्लो कारोबारको दिन अर्थात् मंगलवार कायम अन्तिम सेयरमूल्य १ हजार २८७ को आधारमा सेयरमूल्य समायोजन भएको हो।
नेपाल पुनर्बीमा कम्पनीले गत आवको मुनाफाबाट सेयरधनीलाई १६ दशमलव ५० प्रतिशत बोनस सेयर र २ दशमलव ५० प्रतिशत नगद लाभांश (करसमेत) वितरण गर्ने प्रस्ताव गरेको हो।
त्यस्तै, नेप्सेले उन्नति सहकार्य लघुवित्त वित्तीय संस्थाको ३० प्रतिशत बोनस सेयरको समायोजनपश्चात मूल्य १ हजार ४८८ दशमलव ४६ तोकेको छ। नेप्सेले अघिल्लो कारोबार दिनको अन्तिम मूल्यका आधारमा समायोजन गरेको हो । मंगलवार कम्पनीको शेयर प्रतिकित्ता १ हजार ९३५ मा अन्तिम कारोबार भएको थियो।
कम्पनीले गत आवको मुनाफाबाट सेयरधनीलाई ३० प्रतिशत बोनस सेयर वितरण गर्ने प्रस्ताव गरेको हो।
त्यसैगरी, नेप्सेले मितेरी डेभलपमेण्ट बैंकको १३ दशमलव ३० प्रतिशत बोनस सेयरको समायोजनपछि सेयरमूल्य ४३३ दशमलव शून्य ७ तोकेको छ। कम्पनीको अघिल्लो कारोबारको दिन अर्थात् मंगलवार कायम अन्तिम सेयरमूल्य ५०२ को आधारमा सेयरमूल्य समायोजन भएको हो।
मितेरी डेभलपमेण्टले गत आवको मुनाफाबाट सेयरधनीलाई १३ दशमलव ३० प्रतिशत बोनस सेयर र शून्य दशलमव ७० प्रतिशत नगद लाभांश कर प्रयोजनको लागि वितरण गर्ने प्रस्ताव गरेको छ।
