काठमाडौं- चालु आर्थिक वर्षको ११ महिनामा ११ हजार ४ सय ६६ वटा विद्युतीय कार आयात भएका छन्। सरकारले विद्युतीय कारमा कर बढाउने हल्ला चलेका कारण बैशाख र जेठमा धेरै संख्यामा विद्युतीय सवारी आयात भएको हो।
चालु आवको १० महिना साउनदेखि बैशाखसम्ममा ८ हजार ४ सय ९७ वटा विद्युतीय कार आयात भएकोमा जेठ एक महिनामै २ हजार ९ सय ६९ वटा विद्युतीय कार आयात भएको भन्सार विभागको तथ्यांक छ।
११ महिनामा २९ अर्ब रुपैयाँ बराबरको ११ हजार ४ सय ६६ वटा विद्युतीय कार आयात भएका हुन्।
उक्त संख्यामा कार आयात गर्दा सरकारले १३ अर्ब ६ करोड रुपैयाँ राजस्व आम्दानी गरेको छ। यो अवधिमा सबैभन्दा बढी चीन र भारतबाट धेरै विद्युतीय कार आयात भएको हो।
११ महिनामा ५० किलोवाटसम्म मोटर क्षमता भएका ४३ सय ४४ वटा, ५१ देखि १ सय किलोवाट मोटर क्षमताका ६८ सय ८५ वटार १०१ देखि २ सय किलोवाट मोटर क्षमताका २ सय ९ वटा विद्युतीय कार आयात भएका छन्।
त्यस्तै २०१ देखि ३ सय किलोवाटसम्म मोटर क्षमताका २७ वटा र ३ सय किलोवाटभन्दा माथि मोटर क्षमताको एउटा विद्युतीय कार आयात भएको तथ्यांक भन्सारले सार्वजनिक गरेको छ।
