झापा- भूमिसुधार तथा मालपोत कार्यालय भद्रपुरले चालु आर्थिक वर्षको ११ महिनामा ७० करोड ९८ लाख १३ हजार आठ सय ९१ रूपैयाँ राजस्व संकलन गरेको छ। ११ हजार आठ सय ६१ थान रजिस्ट्रेसन पारितबाट उक्त आम्दानी भएको हो।

चालु आवमा जग्गाको कारोबार बढेकाले राजस्व बढेको मालपोत कार्यालयका सूचना अधिकारी राजु दाहालले बताए। 'गत आव २०७९/८० को ११ महिनाको तुलनामा चालु आवमा २० करोड ८७ लाख ९३ हजार ६ सय १४ रूपैयाँले राजस्व संकलन बढेको छ,' उनले भने।

गत आवको सोही अवधिमा ५० करोड एक लाख २० हजार दुई सय ७७ रूपैयाँ राजस्व संकलन भएको थियो। 

चालु आवमा सेवा करबापत ६ करोड ८६ लाख ७० हजार दुई सय ८९, रजिष्ट्रेसन दस्तुर ४३ करोड ४३ लाख ७८ हजार तीन सय ५५, छुटबापत पाँच करोड ७० लाख ६३ हजार सात सय ४५, डोर सुविधा शुल्क एक लाख ६५ हजार रूपैयाँ संकलन भएको छ।

पुँजीगत लाभकर २६ करोड ३५ लाख ५५ हजार तीन सय ८५ रूपैयाँ र विलम्ब शुल्कबापत एक लाख आठ हजार ६ सय ६ रूपैयाँ राजस्व संकलन गरिएको सूचना अधिकरी दाहालले जानकारी दिए। रासस