काठमाडौं- नेपाल प्रहरीले चालु आर्थिक वर्षको ५ महिनामा २ अर्ब २० करोड ८२ लाख रुपैयाँ भन्दा बढी राजस्व संकलन गरेको छ। संकलित यो रकम गत वर्षको सोही अवधिको तुलनामा १ सय ६ प्रतिशत बढी हो।
आव २०७७/७८ को साउनदेखि मंसिरसम्मको आवधिमा नेपाल प्रहरीले १ अर्ब ६ करोड रुपैयाँ राजस्व संकलन गरेको थियो। प्रहरीले विभिन्न ८ शीर्षकमा राजस्व संकलन गर्दै आएको छ।
प्रहरीले सबैभन्दा बढी राजस्व अवैध सुन बरामदबाट संंकलन गरेको छ। यो शीर्षकमा आव २०७८/७९ मा ८५ करोड ६१ लख ५५ हजार ७ सय ९१ रुपैयाँ राजस्व उठाएकोमा गत वर्ष १९ करोड ४२ लाख ३७ हजार ९ सय ८७ रुपैयाँ राजस्व उठाएको थियो।
त्यस्तै यो वर्षको साउनदेखि मंसिरसम्ममा अवैध चाँदी बरामद गरेर ५७ लाख ८० हजार ५ सय १५, ट्राफिक कारबाहीबाट ५७ करोड ६० लाख ५५ हजार, अवैध मुद्राबाट ५ करोड ८७ लाख ५५ हजार ५ सय ६७, अवैध मालसामानबाट ४३ करोड ८४ लाख ८५ हजार रुपैयाँ रावस्व प्रहरीले उठाएको हो।
यसैगरि अवैध काठबाट १ करोड ४४ लाख ८४ हजार ६ सय ४५, अदालती फैसला कार्यान्वयनबाट २५ करोड ७७ लाख २७ हजार ८ सय ७ र मास्क नलगाए बापत जरिवानाबाट ८ लाख १६ हजार ५ सय रुपैयाँ राजस्व संकलन भएको हो।
अन्य शीर्षकमा गत वर्षको तुलनामा रावस्व संकलन बढेको भएपनि मास्क नलगाएबापतको जरिवाना भने ८१ प्रतिशतले घटेको नेपाल प्रहरीले जनाएको छ।
