काठमाडौं- बागमती प्रदेश सरकारले मनोरञ्जन व्यवासायमा व्यापक कर लगाएको छ। प्रदेश सरकारले प्रदेशसभामा प्रस्तुत गरेको बागमती आर्थिक ऐनमा मनोरञ्जन करमा विभिन्न शीर्षक थप गरेर सबै पेसालाई जोडेको छ।
थियटर/नाटकघर, भिडियो घर, सांस्कृतिक प्रदर्शन हल र ओपेराको हकमा महानगर तथा उपमहानरमा रहेकालाई वार्षिक १० हजार, नगरपालिकामा ७ हजार र गाउँपालिकामा ५ हजार रुपैयाँ कायम गरिएको छ। यो कर पहिले थिएन।
यसैगरी डान्सबार, नाइट क्लब र रात्रिकालीन सेवाको हकमा महानगर/उपमहानगपालिकामा १ लाख, नगरपालिकामा ५० हजार र गाउँपालिको हकमा २५ हजार रुपैयाँ वार्षिक कर लाग्ने भएको छ।
यसैगरी दोहोरी साँझ/रोदीघरको हकमा महानगर/उपमहानगरमा ३० हजार, नगरपालिकामा १० हजार र गाउँपालिकामा ५ हजार वार्षिक कर लाग्ने छ।
यसैगरी मसाज एवं स्पाको हकमा महानगर/उपमहानगरमा ३० हजार, नगरपालिकामा १० हजार गाउँपालिकामा ५ हजार वार्षिक कर लगाइएको छ।
साथै फनपार्क, आकाशे सिसाको पुलको हकमा महानगर/उपमहानगरमा ५० हजार, नगरपालिकामा ३० हजार र गाउँपालिका १० हजार रुपैयाँ वार्षिक कर लगाइएको छ।
यसैगरी फुटसल, पुल हाउस, स्वीमिङ पुल र जीम हाउसको हकमा महानगर/उपमहानगरमा १० हजार, नगरपालिकामा ७ हजार र गाउँपालिकमा ५ हजार रुपैयाँ वार्षिक कर लाग्ने छ।
साथै स्वीङ, वाटर गार्डेन, वाल उद्यान, पार्क, ताल तलैया, क्रुज, बोटिङ वा ढुंगा सफारी र रक क्वाइम्बिङको हकमा महानगर/उपमहानगरमा ५ हजार, नगरपालिकामा ३ हजार र गाउँपालिका दर्ता हुनेको हकमा वार्षिक ३ हजार रुपैयाँ कर लगाइएको छ। यी सबै नयाँ कर हुन्।
