बिहीबार , साउन १० गते २०८१    
images
images
images

दाङमा तरबुजाखेतीबाट राम्रो आम्दानी गर्दै छन् रोल्पाका दुई किसान

images
बिजनेस न्युज
बिजनेस न्युज
शुक्रबार, जेठ ३२ २०८१
images
images
दाङमा तरबुजाखेतीबाट राम्रो आम्दानी गर्दै छन् रोल्पाका दुई किसान

खेर गइरहेका बगरमा यसरी तरबुजाखेती गर्नसके स्वदेशमै आत्मनिर्भर बन्न सकिन्छ भने सीप र जाँगर भए विदेशिनु पर्दैन भन्ने दरिलो उदाहरण युवा किसानले दिएका छन्।

images

दाङ- रोल्पा माडी गाउँपालिका-१ जबाङ दुदिलाबोटका २६ वर्षीय वीरेन्द्र खड्का र परिवर्तन गाउँपालिका-५ का ३१ वर्षीय वीरेन्द्र वलीले दाङमा तरबुजाखेतीबाट मनग्य आम्दानी लिन थालेका छन्।

images
images

घोराही उपमहानगरपालिका-७ घुस्रामा ती युवा मिलेर बबई नदी किनारमा तरबुजाखेती गरेर मनग्य आम्दानी गर्दै आएका छन्।

images

विगतमा बालुवैबालुवाले उराठिलो रहेको बगर अहिले हरियालीमा परिणत भएको छ। बगरमा सोचेभन्दा राम्रो तरबुजा उत्पादन भएपछि आफूहरू खुसी भएको किसान खड्का बताउँछन्।

images

कृषि विषय अध्ययन गरेका उनी आफ्नै ठाउँमा कृषि पेसाबाट अगाडि बढ्ने बताउँछन‍्। उनले भने, 'कृषिसम्बन्धी अध्ययन गरेको र आफ्नै ठाउँमा केही गर्नुपर्छ भन्ने उद्देश्यले छ वर्षअघि कृषि फार्म स्थापना गरेर पुष्प व्यावसाय गर्दै आएको थिएँ, एकजना साथी थपिएपछि अहिले दुईजना मिलेर घोराहीमा व्यावसायिक तरबुजाखेती पनि सुरु गरेका हौँ।' यसबाट राम्रो आम्दानी भइरहेको उनले बताए। दाङ एग्रोमार्ट कृषि फार्ममार्फत व्यवसाय गर्दै आएका छन्।

images

घुस्रामा चार बिघा र झिँगौरामा नौ कठ्ठा जग्गा ५० हजार रुपैयाँ तिर्ने गरेर तीन महिना अवधिको लागि जग्गा भाडामा लिएर तरबुजाखेती गरिरहेका छन्। अहिले सरस्वती र विशाला जातको तरबुजा ५० रुपैयाँ किलोका दरले र आरोही ७० रुपैयाँ किलोका दरले बिक्री गर्दै आइरहेको अर्का किसान वीरेन्द्र वली बताउँछन्।

उनका अनुसार अहिले दैनिक सात-आठ सय किलो बिक्री हुन्छ। हालसम्म १४ हजार किलो बिक्री गरिसकेको उनले जानकारी दिए। तीन महिनाको अवधिमा १० लाख रुपैयाँको कारोबार गर्ने र आधाभन्दा बढी रकम बचत गर्ने लक्ष्य रहेको उनले बताए।  

'सोचेभन्दा राम्रो आम्दानी भइरहेको छ', किसान वलीले भने। अरुको देशमा जानुभन्दा स्वदेशमै आत्मनिर्भर हुनका लागि कृषि पेसा रोजेको हुँदा यसैलाई निरन्तरता दिने उनले बताए।

उनले भने, 'तर केही बजारीकरणमा समस्या भएको हुँदा सरकारले बाहिरी देशबाट आउने तरबुजालाई रोक्ने प्रयास गर्यो भने आफूलगायत अन्य किसानलाई सहज हुनेछ। कम विषादीयुक्त र जैविक उत्पादन गरिरहेकाले आम उपभोक्ताको रोजाइमा परेको उनले बताए। 

दाङ एग्रोमार्ट कृषि फार्ममा तरबुजा किन्न पुगेका घोराही उपमहानगरपालिका-१४ निवासी अर्जुन गौतम गर्मीको समयमा यसको महत्व धेरै हुने भएकाले खान मन लागेको समयमा यही आएर लैजाने गरेको उनले बताए।

यहाँ आएर लैजाँदा ताजा, जैविक पाइने हुँदा स्वास्थ्यलाई फाइदा पुग्ने उनले बताए। बाहिरी देशबाट आएको खानुभन्दा आफ्नै गाउँठाउँमा उत्पादित वस्तु खान अन्य नागरिकलाई पनि उनले आग्रह गर्छन्।

यसअघि किसान वीरेन्द्र खड्काले घोराही उपमहानगरपालिका-१४ झिँगौरामा गरेको स्ट्राबेरीखेतीबाट १४ लाख रुपैयाँभन्दा बढीको कारोबार गरेका थिए।

खेर गइरहेका बगरमा यसरी तरबुजाखेती गर्नसके स्वदेशमै आत्मनिर्भर बन्न सकिन्छ भने सीप र जाँगर भए विदेशिनु पर्दैन भन्ने दरिलो उदाहरण युवा किसानले दिएका छन्। रासस


प्रकाशित : शुक्रबार, जेठ ३२ २०८११३:३०
प्रतिक्रिया दिनुहोस
कार्यकारी सम्पादक

केदार दाहाल

सूचना तथा प्रसारण विभाग दर्ता नम्बर

२८३८/०७८-७९

© 2024 All right reserved to biznessnews.com  | Site By : SobizTrend