काठमाडौं- नेपाल नागरिक उड्डयन प्राधिकरणले आर्थिक वर्ष सुरू भएको पाँच महिनापछि बल्ल बजेट पास गरेको छ। आइतबार प्राधिकरणमा बसेको सञ्चालक समितिको बैठकले ४३ अर्ब ६० करोड ७७ लाख रूपैयाँ बराबरको बजेट पारित गरेको हो। 

चालु आर्थिक वर्ष सुरु भएको पाँच महिनापछि बजेट आएकोले कार्यन्वयनमा भने शंका उत्पन्न भएको छ।

संस्कृति, पर्यटन तथा नागरिक उड्ड्यन मन्त्री प्रेम आलेको अध्यक्षतामा बसेको बैठकले बजेट पारित गरेको प्राधिकरणका महानिर्देशक राजकुमार क्षेत्रीले जानकारी दिए। ‘४३ अर्ब ६० करोड ७७ लाख रुपैयाँको बजेट विनियोजन गरिएको छ,’ क्षेत्रीले भने। 

बजेटमा सबैभन्दा धेरै निर्माणको चरणमा रहेको पोखरा क्षेत्रिय अन्तर्राष्ट्रिय विमानस्थलका लागि १० अर्ब रुपैयाँ बजेट छुट्याइएको छ।

त्यस्तै भैरहवामा निर्माणमाधीन गौतम बुद्ध अन्तर्राष्ट्रिय विमानस्थलको लागि ६ अर्ब रुपैयाँ छुट्याएको छ। निजगढ विमानस्थलका लागि ३६ करोड रुपैयाँ विनियोजन गरिएको छ।

धनगढी विमानस्थलका लागि पर्यटनमन्त्री आलेले १ अर्ब रुपैयाँ छुट्याएका छन्। त्यस्तै भैरहवाको दोस्रो टर्मिनल भवन निर्माणका लागि ६० करोड रुपैयाँ विनियोजन गरिएको छ।