विराटनगर- नेकपा एमालेका अध्यक्ष केपी शर्मा ओलीले मिलेनियम च्यालेन्ज कर्पोरेसन (एमसीसी) का विषयमा सरकारको धारणा स्पष्ट रुपमा आउनुपर्ने बताएका छन्।

विराटनगर विमानस्थलमा शनिबार सञ्चारकर्मीसँग सङ्क्षिप्त कुराकानीका क्रममा उनले भने, 'एमसीसीका विषयमा व्यक्तिगत रुपमा कुरा गरेर हुँदैन, सरकारको धारणा के हो? स्पष्ट हुनुपर्छ।'

सत्ता साझेदार दलबीच नै एमसीसीबारे सहमति जुट्न नसकिरहेका बेला अध्यक्ष ओलीले सरकारको धारणा आउनुपर्ने बताएका हुन्। केही नेताले यकीन धारणा नराखिदिँदा एमसीसीबारे सहमति जुट्न सकेको छैन।

सत्तारुढ गठबन्धनमा रहेका नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चा सर्वदलीय बैठकमार्फत एकै धारणा बनाउने प्रयासमा रहे पनि निष्कर्ष निस्किन सकेको छैन। 

नेपाल सरकार र एमसीसीबीच २०७४ भदौ २९ गते भएको सम्झौता संसदबाट अनुमोदन नभएका कारण कार्यान्वयन हुन सकेको छैन। एमसीसी परियोजनाअन्तर्गत अमेरिकाले नेपाललाई ५० करोड अमेरिकी डलर बराबरको पाँच वर्षे अनुदान दिनेछ। त्यसमार्फत ३ सय किलोमिटर लामो प्रसारण लाइन र सडक स्तरोन्नतीको काम हुनेछ।