काठमाडौं- भित्रि कारोबारमा संग्लन भएको आरोप लागेपछि बर्खास्त भएका नेपाल धितोपत्र बोर्डको अध्यक्ष भिष्मराज ढुंगानालाई सर्वोच्च अदालतमार्फत समेत धक्का मिलेको छ। ढुंगानाले कात्तिक ७ गते पुनर्बहालीको माग गर्दै सर्वोच्चमा रिट दायर गरेका थिए।
ढुंगानाको मुद्दाको पेसी पुस ७ गतेका लागि तोकिएको थियो। उक्त मुद्दाको बहसमा न्यायाधीशहरू प्रकाशमान सिंह राउत र कुमार चुडालको इजलासमा राय बाझिएपछि पूर्ण इजलासमा बहस हुने भएको छ। ढुंगानाको मुद्दा पूर्णइजलासमा गएसँगै अब उनी धितोपत्र बोर्ड फर्कने सम्भावना टरेको छ।
एक न्यायाधीशले सरकारको निर्णय बदर गर्ने राय राखेको र अर्कोले सरकारको निर्णय सदर गर्नुपर्ने राय राखेपछि पूर्ण एजलासमा पठाइएको हो। ढुंगानाले सरकारले आफूलाई गैरकानूनी तवरले हटाएको भन्दै कात्तिक ७ गते सर्वोच्च अदालतमा रिट दायर गरेका थिए।
सर्वोत्तम सिमेन्टको सेयर कारोबार प्रकरणमा मुछिएका ढुंगानालाई असोज १९ गते बसेको मन्त्रिपरिषद् बैठकले बर्खास्त गरेको थियो।
बुक बिल्डिङमार्फत सर्वोत्तमले सर्वसाधारणका लागि आईपीओ जारी गर्दा अध्यक्ष ढुंगानाकी छोरी रेबिका ढुंगानाको नाममा १२ हजार कित्ता सेयर नामसारी भएको पाइएको थियो। ढुंगानामाथि लागेको आरोपको सम्बन्धमा जाँचबुझ गर्न गठित समितिले सकारलाई प्रतिवेदन बुझाएपछि सरकारले उनलाई बर्खास्त गरेको थियो।
