काठमाडौं- सुनको मूल्य लगातार चौथो दिन पनि बढेको छ। यो साता नेपाली बजारमा आइतबार स्थिर रहेर त्यसयता निरन्तर उकालो लागेको सुनको मूल्य बिहीबार पनि बढेको हो।

बिहीबार सुनको मूल्य प्रतितोला दुई हजार ३ सय रूपैयाँले वृद्धि भएको नेपाल सुनचाँदी व्यवसायी महासंघले जनाएको छ।

महासंघका अनुसार बिहीबार छापावाल सुनको मूल्य प्रतितोला एक लाख ४० हजार ५ सय रूपैयाँ पुग्दा तेजाबी सुनको मूल्य प्रतितोला एक लाख ३९ हजार ८ सय रूपैयाँ निर्धारित छ। 

यो साता सोमबार तीनसय र मंगलबार चारसय रूपैयाँले बढेको सुनको मूल्य बुधबार प्रतितोला ६ सय रूपैयाँले बढेको थियो।

बुधबार प्रतितोला १० रूपैयाँले बढेको चाँदीको मूल्य भने बिहीबार प्रतितोला ३० रूपैयाँले घटेको छ।

बिहीबारका लागि चाँदीको मूल्य प्रतितोला एक हजार ९ सय रूपैयाँ तोकिएको छ।