इलाम- नेपाल-भारत सीमा क्षेत्रबाट अवैध रूपमा नेपाली सिमाना कटाउन लागेको सामग्रीसहित एउटा पिकअक भ्यान नियन्त्रणमा लिइएको छ। इलाम सूर्योदय नगरपालिका-२ स्थित दुई माइलबाट अवैध रूपमा सामान राखेर भारततर्फ लैजाँँदै गरेको पिकअप नियन्त्रणमा लिइएको हो।
सवारीसहित १३ लाख रूपैयाँभन्दा बढीका सामग्री नियन्त्रणमा लिइएको हो। सशस्त्र प्रहरी बल नेपाल प्रस्तावित सीमा सुरक्षा गुल्मको मोबाइल गस्ती टोलीले सो सामान सोमबार नियन्त्रणमा लिएको हो।
प्रदेश नम्बर १-०३-००१ज ००१९ नम्बरको पिकअपबाट सामान लैजाँदै गर्दा बरामद गरिएको हो।
प्रहरीलाई देखेपछि गाडी छाडेर चालक भागेका थिए। बक्खु कपडा, चिप्लो बक्खु, हाल्फ ज्याकेट, जेन्स र लेडिज चप्पल, अन्य ज्याकेट, ट्राउजर, गहुँ, मकैको च्याख्ला गरेर ६ लाख १८ हजार तीन सयको सामग्री नियन्त्रणमा लिइएको जनाइएको छ।
त्यस्तै सवारीको मूल्य सात लाख कायम गरेर १३ लाख १८ हजार तीनसय रूपैयाँ बराबरका सामग्री बरामद भएको जनाइएको छ। रासस
