काठमाडौं- लगातार बढेर रेकर्ड बनाइरहेको सुनको मूल्य मंगलबार ओरालो लागेको छ।
सोमबार तोलामा ९ सयले बढेर कीर्तिमानी बिन्दुमा पुगेको सुनको मूल्य मंगलबार प्रतितोला १२ सय रूपैयाँले घटेको हो।
मंगलबार नेपाली बजारमा छापावाल सुनको मूल्य प्रतितोला एक लाख ४० हजार ६ सय रूपैयाँमा झरेको छ भने तेजाबी सुनको मूल्य प्रतितोला एक लाख ३९ हजार ९ सय रूपैयाँ तोकिएको छ।
यो साता आइतबार तोलामा १६ सय रूपैयाँले बढेर सुन प्रतितोला एक लाख ४० हजार ९ सय पुगेको थियो भने सोमबार प्रतितोला एक लाख ४१ हजार ८ सय रूपैयाँमा सुनको कारोबार भएको थियो।
लगातार बढिरहेको चाँदीको मूल्यमा पनि मंगलबार गिरावट आएको छ। चाँदी आज तोलामा ५५ रूपैयाँले घटेर प्रतितोला एक हजार ८ सय ८५ रूपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ।
सोमबार चाँदी प्रतितोला एक हजार ९ सय ४० रूपैयाँमा कारोबार भएको थियो।
