काठमाडौं- निरन्तर उकालो लाग्दै लगातार रेकर्ड बनाइरहेको सुनको मूल्य सोमबार पनि कीर्तिमानी बिन्दुमा पुगेको छ।
सोमबार प्रतितोला ९ सयले बढेर सुनको मूल्य हालसम्मकै उच्च प्रतितोला एक लाख ४१ हजार ८ सय रूपैयाँ पुगेको छ।
यस्तै नेपाली बजारमा तेजाबी सुनको मूल्य सोमबार प्रतितोला एक लाख ४१ हजार एकसय रूपैयाँ तोकिएको छ।
आइतबार सुन हालसम्मकै उच्च प्रतितोला एक लाख ४० हजार नौ सय रूपैयाँ कायम थियो।
चाँदीको मूल्य पनि लगातार बढिरहेको छ। आइतबारको तुलनामा सोमबार चाँदी प्रतितोला ३० रूपैयाँले महँगिएर हालसम्मकै उच्च मूल्य कायम भएको नेपाल सुनचाँदी व्यवसायी महासंघले जनाएको छ।
महासंघका अनुसार चाँदी सोमबार प्रतितोला एक हजार ९ सय ४० रूपैयाँमा कारोबार भइरहेको छ।
