काठमाडौं- निर्माणकै सिर्जनमा निर्माणजन्य बस्तुको खपतमा कमी आएको छ। खपतमा कमी आएसँगै मूल्यमा पनि गिरावट आएको छ। मूल्य घटेसँगै उपभोक्तालाई केही राहत भएको छ।

सिजनमै निर्माण सामग्रीको खपत ५० प्रतिशतले घटेको व्यवसायीको भनाइ छ। बैंक तरलता र विकास खर्चमा आएको कमीका कारणले निर्माणजन्य बस्तुको खपत घटेको हो।

व्यवसायीका अनुसार अहिले सिमेन्टको मूल्यमा प्रतिबोरा ५० रुपैयाँ र डण्डीको मूल्य प्रतिकिलो ५ रुपैयाँसम्म घटेको छ। बैंकमा देखिएको तरलता अभावका कारण कर्जा जारी हुन सकेको छैन। जसका कारण निजी आवास निर्माणमा समेत कमी आएको छ। अर्कोतर्फ सरकारले विकास खर्च बढाउन नसक्दा पनि निर्माण सामग्रीको खपतमा कमी आएको हो।

बजारमा अहिले सिमेन्टको मूल्य ७ प्रतिशतसम्म घटेको छ। विकास खर्च नबढ्ने र बैंकिङ तरलता अभाव सुधार नहुने हो भने निर्माण सामग्रीको खपत अझै घट्ने व्यवसायीहरूको भनाइ छ। बजारमा अहिले सिमेन्टको मूल्य पिपिसीमा ५ सय ७५ रुपैयाँ र ओपिसी सिमेन्टको मूल्य ६ सय ७५ रुपैयाँ झरेको व्यवसायीको भनाइ छ।

यस्तै, डन्डीको उपभोक्ता मूल्य प्रतिकिलो एक सय पाँचदेखि एक सय १० रुपैयाँसम्म रहेकोमा अहिले घटेर एक सयदेखि एक सय पाँच रुपैयाँसम्ममा झरेको छ।