काठमाडौं- बानेश्वर क्षेत्रमा फल्चा शैलीमा निर्माण गरिएको प्रतिक्षालय सञ्चालनमा आएको छ। कलात्मक थाम, निदाल र दलिनको प्रयोग गरिएको फल्चाले परम्परागत सीप र कला जोगाउन मद्धत गर्ने विश्वास गरिएको छ। 

फल्चामा बस्नका लागि काठकै मेच राखिएका छन्। बिसौनीभित्र प्रकाशका लागि बत्ती जडान गरिएका छन्। फल्चा निर्माणमा स्थानीय सहभागिता भएकोले यसको संरक्षणका लागि स्थानीयवासीले निगरानी गर्नेछन्। स्थानीयहरुको निगरानीमा नगर प्रहरीले सहयोग गर्ने जानकारी दिइएको छ।

वडा सचिव सुवोध खड्काका अनुसार यस क्षेत्रमा उस्तै शैलीका दुईवटा बस बिसौनी निर्माण भएका छन्। यी दुईवटा फल्चाको लागत ६२ लाख रूपैयाँ रहेको छ।

बानेश्वरबाट बबरमहलतर्फ आउँदा सडक खण्डमा रहेको बिसौनी आज मंगलबारबाट सञ्चालनमा आएको हो भने बबरमहलबाट बानेश्वरतर्फको सडक खण्डमा रहेको बिसौनी आउँदो महिनाभित्र सञ्चालनमा आउनेछ।

तस्बिरहरू : नेपाल फोटो लाइब्रेरी