काठमाडौं- गृहमन्त्री बालकृष्ण खाँड करको दायरामा आएका होटल तथा रेष्टुरालाई २४ घण्टा नै सञ्चालन गर्न दिनुपर्ने बताएका छन्।

सोमबार अर्थ मन्त्रालयमा आयोजित पुँजीगत खर्चसम्बन्धी अन्तरमन्त्रालयगत छलफल तथा अन्तरक्रिया कार्यक्रमलाई सम्बोधन गर्दै गृहमन्त्री खाँडले यस्तो अभिव्यक्ति दिएका हुन्।

‘करको दायरामा रहेका होटल तथा रेष्टुराँलाई २४ घण्टा नै सञ्चालन गर्नु दिनुपर्छ’ उनले भने, ‘यसो गर्दा व्यवसाय पनि फस्टाउने र राजस्व पनि वृद्धि हुन्छ।’

२४ घण्टा नै होटल तथा रेष्टुराँ सञ्चालन गर्दा प्रहरीले सुरक्षा दिनसमेत तयार रहेको मन्त्री खाँडको भनाइ छ।

अहिले प्रहरीले १० नबज्दै उपत्यका रेष्टुरा बन्द गराउँदै हिडिरहेका छन्। उनीहरूले सुरक्षाका कारण देखाउँदै होटल तथा रेष्टुराँ बन्द गराउन माथिको निर्देशन छ भनिरहेका हुन्छन्। तर, मन्त्री खाँडले भने करका दायरामा रहेका होटल तथा रेष्टुराँ २४ घण्टा नै सञ्चालन गर्न दिनु पर्ने बताएका हुन्।

केपी शर्मा ओली नेतृत्वका गृहमन्त्री रामबहादुर थापाले उपत्यकाको होटल तथा रेष्टुरा १० बजेपछि खुलेको अवस्थामा बन्द गराउने प्रहरीलाई दबाद दिएका थिए। सोही बेलादेखि प्रहरीले माथिको निर्देशन भन्दै १० बजेपछि होटल तथा रेष्टुरा बन्द गराउँदै आएको थिए। कतिपय ठाउँमा त होटल रेष्टुरामा रमाइलो गरेर बसेका लागिसमेत प्रहरीले दुःख दिने गरेको थियो।