काठमाडौं- पछिल्लो महिना क्युआर कोर्ड पेमेन्ट रमकमा कमी आएको छ। नेपाल राष्ट्र बैंकका अनुसार २०७८ कात्तिकमा ५ अर्ब ३६ करोड २० लाख रुपैयाँ क्युआर कोर्डबाट पेमेन्ट भएको छ।
असोज महिनामा क्युआर कोर्ड मार्फतको पेमेन्ट रकम ६ अर्ब ९ करोड ७० लाख रुपैयाँ थियो।पेमेन्टसँगै क्युआर कोर्डमार्फत हुने ट्रान्जेक्सन संख्यामा पनि १ लाख २८ हजारले घटेको छ।
असोजमा १५ लाख १५ हजार ३ सय २९ वटा ट्रान्जेक्सन भएको थियो भने यो संख्या कात्तिकमा १३ लाख ८७ हजार ५ सय ८४ मा झरेको हो।
वालेट कारोबार पनि घट्यो
राष्ट्र बैंकका अनुसार असोज महिनाको तुलनामा कात्तिक महिनामा वालेट कारोबार रकम पनि घटेको छ। असोज महिनामा १५ अर्ब १८ करोड ७० लाख रुपैयाँ वालेटबाट कारोबार भएको थियो।
कात्तिकमा यो रकम घटेर १३ अर्ब ९४ करोड ९० लाख रुपैयाँमा झरेको छ। यसैगरी वालेट ट्रान्जेक्स संख्यामा पनि गिरावट आएको छ।
असोजमा महिनामा कुल १ करोड ३५ लाख ६५ हजार ५४ वटा वालेट ट्रान्जेक्सन थियो। यो संख्या कात्तिकमा घटेर १ करोड ३० लाख ३० हजार ८ सय ५६ मा सिमित भएको छ।
यसैगरी मोबाइल बैंकिङ र इन्टरनेट बैंकिङ मार्फतको टान्जेक्सन तथा कारोबार रकम समेत घटेको छ। क्रेटिड कार्ड, डेबिट कार्ड, आइफिएस, आइफिएस कनेक्ट, ईसिसि लगायत सबै माध्यमबाट हुने कारोबार रकममा कमी आएको छ।
