काठमाडौं- कोरोनाका कारण शिथिल बनेको उद्योग व्यवसायमा पुनः उत्साह सुरु भएको छ। उद्योग दर्ता तथा लगानी प्रतिवद्धता रकममा उल्लेख्य मात्रामा वृद्धि भएको छ।

उद्योग विभागका अनुसार चालु आवको साउनदेखि मंसिरसम्ममा गत आर्थिक वर्ष २०७७/०७८ कै संख्याामा उद्योग तथा लगानी प्रतिवद्धता आइसकेको छ।

उद्योग विभागका अनुसार चालु आवको पहिलो ५ महिनामै १३४ जटा उद्योग दर्ता भएका छन्। जसमा पर्यटन उद्योगदेखि हाइड्रोपावरसमेत रहेका छन्। चालु आवको पहिलो ५ महिनामै ३ वटा इन्भेष्टमेन्ट कम्पनीमार्फत उद्योगमा लगानी आएको छ। 

चालु आवको साउनदेखि मंसिरसम्ममा १ खर्ब ३९ अर्ब रुपैयाँ बराबरको लगानी प्रतिबद्धता अनुसार १३४ वटा उद्योग दर्ता भइसकेको छ। गत आर्थिक वर्षमा १ खर्ब ५६ अर्बको लगानी आएको थियो। तर यो वर्षको पहिलो ५ महिनामा १ खर्ब ३९ अर्बको लगानी प्रतिवद्धता आएको छ।

साथै गत आर्थिक वर्षभर ३२ अर्बको विदेशी लगानी प्रतिबद्धता आएको भए पनि अहिले नै २५ अर्ब रुपैयाँ भन्दाबढीको आइसकेको छ। जसमा सबैभन्दा बढी होटल तथा हाइड्रोपावर क्षेत्रमा रहेको छ। साथै उत्पादनमुलक क्षेत्रमा पनि लगानी प्रतिवद्धता बढेको छ।