काठमाडौं- नेपाल राष्ट्र बैंकले लक्ष्मी सनराइज बैंकका संस्थापक राजेन्द्र कुमार खेतानलाई १० लाख रुपैयाँ जरिबाना गराएको छ। 

साविकको लक्ष्मी बैंकको संस्थापक लगानीकर्ता रहेका खेतानले ऋणी पंकज झुनझुनवालाको नाममा प्रवाह गरेको १२ करोड रुपैयाँ कर्जामध्ये ११ करोड ४४ लाख रुपैयाँ आफ्नो खातामा ट्रान्सफर गरी कर्जा दुरुपयोग गरेको भन्दै राष्ट्र बैंकले जरिबाना गराएको हो। 

साविकको लक्ष्मी बैंकका अध्यक्ष खेतानले राष्ट्र बैंकको निर्देशन विपरीत झुनझुनवालाको खातामा रकम ट्रान्सफर गरी सेयरमा लगानी गरेको तथ्य बाहिर आएपछि राष्ट्र बैंकको सुपरिवक्षेण विभागको अनुसन्धान गरेको थियो। 

विभागले गरेको अनसाइड तथा अफसाइड सुपरिवेक्षणका क्रममा राजेन्द्र खेतानले बैंकबाट कर्जा दुरुपयोग गरेको देखिएकाले राष्ट्र बैंकले १० लाख रुपैयाँ जरिबाना गराएको हो।   

साविकको लक्ष्मीबाट प्रवाह भएको कर्जा बैंकको सेयरधनीको खातामा ट्रान्सफर भएको देखिएको, उक्त कर्जाको दुरुपयोग भएको जानकारी भएपनि समयमा नै अनुगमन नगरेको भन्दै बैंकका तत्कालीन प्रमुख कार्यकारी अधिकृतलाई समेत राष्ट्र बैंकले सचेत गराएको छ।