नवलपरासी- पश्चिम नवलपरासीको पाल्हीनन्दन गाउँपालिका-६ का आगलागी पीडितलाई नगद राहत दिइने भएको छ।
गत शुक्रबार दिउँसो लागेको आगलागीबाट घरबारविहीन भएका ११ परिवारलाई नगद राहत दिने निर्णय भएको गाउँपालिकाका प्रमुख प्रशासकीय अधिकृत बुद्धप्रकाश पौडेलले जानकारी दिए।
उनका अनुसार घर जलेर पूर्णक्षति भएका परिवारलाई प्रतिपरिवार ७० हजार रूपैयाँ, आंशिक क्षति भएकालाई ४० हजार रूपैयाँ र कम क्षति भएकालाई अवस्था हेरेर नगद राहत उपलब्ध गराइने निर्णय भएको छ।
एउटा पसलमा लागेको आगो अन्य घरमा सल्किएको थियो। आगलागीबाट चार घरमा पूर्णक्षति भएका र अन्य घरमा पनि क्षति पुगेको पालिकाको वडा नं ६ निवासी चन्ना धोवीले बताए।
पश्चिम नवलपरासीका प्रमुख जिल्ला अधिकारी सुरेश पन्थीले आगलागीबाट क्षति भएका परिवारलाई उचित राहतका लागि पहल भइरहेको जानकारी दिए। रासस
