काठमाडौं- गैरकानूनी सम्पत्ति आर्जन गरेको अभियोगमा राष्ट्रिय सूचना प्रविधि केन्द्रका तत्कालीन कार्यकारी निर्देशक तथा नेपाल टेलिकमका निलम्बित प्रबन्ध निर्देशक सुनिल पौडेलविरुद्ध भ्रष्टाचार मुद्दा दायर भएको छ।
पौडेलले पदीय मर्यादाविपरीतका कामगरी गैरकानूनी सम्पत्ति आर्जन गरेको उजुरीमाथि अनुसन्धान गरेर २३ करोड ७५ लाख ४६ हजार ३ सय २४ रुपैयाँ बिगो कायम गरी आइतबार विशेष अदालतमा मुद्दा दायर गरेको अख्तियारले जनाएको छ।
भ्रष्टाचार निवारण ऐन २०५९ को दफा २० को उपदफा २ बमोजिम बिगोअनुसार कैद र बिगोबमोजिम जरिबानाको सजाय हुनुपर्ने उल्लेख गरिएको छ।
गैरकानूनी सम्पत्ति आर्जन गरेको विषयमा अनुसन्धानका लागि भन्दै अख्तियारले उनलाई गएको माघ १० मा पक्राउ गरेर हिरासतमा राखेको छ।
साथै सुनिलले सार्वजनिक सेवाको पदमा रहँदाका बखत अख्तियारको दुरुपयोग गरी गैरकानूनी रूपमा सम्पत्ति आर्जन गरेको स्रोत नखुल्ने सम्पत्तिबाट निजको सहोदर दाजु अनिल पौडेलका नाममा खरिद गरिएका घरजग्गा भ्रष्टाचार निवारण ऐन, २०५९ को दफा ४७ तथा अख्तियार दुरूपयोग अनुसन्धान आयोग ऐन, २०४८ को दफा २९ 'ख' बमोजिम जफत गर्ने प्रयोजनार्थ अनिललाई पनि प्रतिवादी कायम गरी आरोपपत्र दायर गरिएको अख्तियारले जनाएको छ।
